АҞӘА, ԥхынҷкәын 22 — Sputnik, Наала Аҩӡыԥҳа. Атәыла Ахада исаит иханарҭәаауеит Аԥсны азакәанқәа рофициалтә ҵаҵӷәы. Абри аҩыза азакәан апроект рыдыркылеит Апарламент адепутатцәа.
Апарламент иаднакыло азакәанқәа амчра роуит ҳәа иԥхьаӡахоит урҭ атәыла Ахада исаит аҟны ианыркьыԥхьлак ашьҭахь. Аофициалтә ҵаҵӷәы ҳәа иара убасгьы иԥхьаӡоуп агазеҭқәа "Республика Абхазиа", "Аԥсны", азакәанԥҵаратә актқәа реизгашәҟәы.
Азакәанқәа асаит аҟны рцәырҵра иалнаршоит атәылауаа аинформациа ҭкаа рыҭара, ҳәа азгәеиҭеит адепутат Валери Агрба.
"Ҳара зегьы иаадыруеит азакәанԥҵаратә актқәа реизгашәҟәы амԥыхьашәара шалымшо. Агазеҭқәа реизгақәа рҟны уеимдалароуп иуҭаху закәанк уԥшаарц азы. Уи маншәалам. Иҳадаҳкылаз азакәан аинформациа аиура адагьы азинтә культура анырра анаҭоит", — иҳәеит Агрба.
Азакәан апроект адкыларазы еицҿакрыла рыбжьы рҭиит 26-ҩык адепутатцәа.
