АҞӘА, ԥхынҷкәын 22 — Sputnik, Асҭанда Арӡынԥҳа. Архип Лабахәуа ахәаԥшцәа ирыдигалеит иҿыцу ацәыргақәҵа "Три стены или что это?" Аскульптурақәа, афотографиақәа, атекстқәа рыла ишьақәгылоу аекспозициа-инсталиациа аатит ашәахьа, ԥхынҷкәын 21 рзы Аҟәа адраматә театр ашьҭаҵарҭаҟны.
Ари ацәыргақәҵа аҟазареи аиумори реицыҟазаара алзыршо абызшәеи асахьаркыратә лшареи рыԥшаара аҽазышәара иазырхоуп. Аекспозициа иалахәыла хаданы иҟоуп Конан Доиль ифырхацәа, ҳәа азгәеиҭеит автор, Архип Лабахәуа.
"Холмси Ватсони ртема хьыԥшратәуп. Хәышықәса раԥхьа Аҟәаҟа дааит саҳәшьаԥа, арежиссиор. Ҳара иҳаӡбеит хәмаршақә Конан Доиль имотивқәа рыла акино аҭыхра. Сара уи ихьырԥшу комиксны исшьон. Ацәыргақәҵа аекспонатқәа мҩаԥызго атексттә хҳәаақәа зегьы автор истәуп, акада. Уи – Холмс Ватсон "аламыс умоума" ҳәа дахьиазҵаауа ауп. Аинтернет аҟынтәи иаазгеит", — иҳәеит Лабахәуа.
Ацәыргақәҵа ахьӡ уаанӡатәи цәыргақәҵак аҟны иҟаз декорациак иднагалаз акоуп, ҳәа азылыԥхьаӡоит асахьаҭыхратә зал акуратор Татиана Ергунова.
"Архип уаанӡатәи ҳцәыргақәҵа далахәын. Убасҟан ауп абри ашьҭаҵарҭа ахархәара шауа азы аидеиа анихҭашәаз. Азал агәҭа иҟоу абри х-ҭӡамцк змоу ауада ихатә цәыргақәҵа ахьӡ аҭаразы ицхрааит", — лҳәоит Ергунова.
Афотограф Инна Џьениаԥҳа лгәаанагарала, ацәыргақәҵа аекспонатқәа зегьы иаку идеиак еиднаҳәалоит, иаку композициа дук еиԥшгьы иудукылоит.
"Аҟазареи аиумори иаку процесск аҩ-ганк ракәны иҟоуп. Архип еснагь илшоит абри иныҭкааны аарԥшра. Сара исылшом исгәаԥхеит ҳәа усумҭа заҵәык алкаара. Сара зегь раасҭа исгәаԥхаз ацәыргақәҵа атмосфероуп", — лҳәеит Џьениаԥҳа.
Ацәыргақәҵа ԥхынҷкәын 26 рҟынӡа иаартуп.
