АҞӘА, ҧхынҷкәын 22 — Sputnik, Бадраҟ Аҩӡба. "Жәларбжьаратәи афонд Аԥсны" иаҧнаҵаз апремиа "Ахьӡырҳәага" аҟны аиааира згаз рыхьыӡқәа ҳәан аҩаша, ҧхынҷкәын 22 рзы имҩаҧысыз ахәылҧаз аҟны.
Апремиа ф-номинациак рыла ишьақәгылоуп: аҭҵаарадырра, аспорт, аекономика, акультура, агәабзиарахьчара, аҵарадырра. Абарҭ ахырхарҭақәа рҟны зҽалзкааз "Жәларбжьаратәи афонд Аԥсны" апремиа ранаршьеит.
Ахәылҧаз алахәылацәеи асасцәеи еизеит ақьафурҭа "Ерцахә" аҟны. Уаҟа, урҭ рзы ахәылҧаз ашҟа инаҧхьаз аҟазацәа аклассикатә музыка рзадырҳәеит.
"Афонд аҧҵоуижьҭеи жәамз раҟара ҵуеит. Ари аамҭа иалагӡаны иҟаҳҵахьоу рацәаӡам, аха имаҷым ҳәагьы исыҧхьаӡоит. Избанзар, ҳара егьырҭ афондқәа реиҧш хырхарҭа мацарак ҳамаӡам агәабзиара иатәума, аекономика иатәума. Ҳара ҳауаажәла ацхыраара ахьырҭаху, адгылара ахьырҭаху, иҳалшо ала аус аауп ҳәа ҳгәы иҭоуп", — иҳәеит "Жәларбжьаратәи афонд Аԥсны" аиҳабы Сонер Гогәуа.
Уи иазгәеиҭеит афонд ишынанагӡо еиуеиҧшым асоциалтә программақәа, апрограмма "Ани амаалықьи" реиҧш иҟоу. Афонд аиҳабы иажәақәа рыла, аҧсуа жәлар рыцхыраара ари нахысгьы иацҵахоит.
Апремиа "Ахьӡырҳәага" аҭҵаарадырра аноминациаҿы аҳамҭа ланаршьеит Саида Багаҭелиа. Акультура аганахь ала апремиа иауит Аҧсны еицырдыруа акомпозитор Оҭар Хәынцариа. Агәабзиарахьчара аҟны далкаахеит аҳақьым Нарҭ Гамгьиа. Иреиӷьу аекономист ҳәа ихьӡ ҳән Џьамал Ажәанба. Аҵарадырраазы аҳамҭа ланашьан Гал ашкол арҵаҩы Есма Ҭарҧҳа. Аспорт аҟны иеихьӡарақәа рзы апремиа даҧсахеит Ален Аҩӡба.
Аноминациақәа рҟны иалкаахаз иранаршьеит агәаларшәагатә ҳамҭақәа.
"Жәларбжьаратәи фонд Аԥсны" аԥҵан мшаԥымза 2, 2015 шықәсазы, уи ахықәкы хадақәа ируакуп Аԥсны иамоу ахьыԥшымра астатус арӷәӷәареи уи азхаҵара арҭбаареи рҿы ацхыраара аҟаҵара. Иара убас аус аулоит аҳәаанырцә инхо ҳдиаспореи ҳареи ҳаимадара арҿиара, ҳдоуҳатә культуреи, ҳмилаҭтә ҷыдарақәеи рыхьчара, ажәларқәа рыбжьара аҭынчреи, аиҩызареи аиқәышаҳаҭреи рыбжьаҵара аганахьала.
