АҞӘА, ԥхынҷкәын 25 — Sputnik, Асҭанда Арӡынԥҳа. Урыстәылатәи Афедерациеи Аԥсны Аҳәынҭқарреи рыбжьара иааиԥмырҟьаӡакәа Аԥсны инхо Урыстәыла атәылауаа ртәанчахәытә еиқәыршәараз Аиқәшаҳаҭра еицҿакрыла аратификациа азыруит Урыстәылатәи Афедерациа Аҳәынҭқарратә Дума адепутатцәа.
Урыстәылатәи Афедерациеи Аԥсны Аҳәынҭқарреи рыбжьара иааиԥмырҟьаӡакәа Аԥсны инхо Урыстәыла атәылауаа ртәанчахәытә еиқәыршәараз Аиқәшаҳаҭра 2015 шықәса мшаԥымза 14 рзы анапы аҵаҩын.
Иара инақәыршәаны ҳтәылауаа ртәанчахәы Урыстәыла Аладатәи афедералтә округ аҟны бжьаратәла ироуа 10 179,65 мааҭ иашьашәалан ишьақәгылароуп. Ашьашәалара хышықәса рыҩныҵҟа инагӡахоит.
Ареспубликаҟны инхоит 32 058-ҩык атәанчахәы зоураны иҟоу Урыстәыла атәылауаа. Иахьазы урҭ ртәанчахәы бжьаратәла 6 262,33 мааҭ инаӡоит.
Урыстәыла Аладатәи афедералтә округ аҟны бжьаратәла ироуа 10 179,65 мааҭ артәоит. Атәанчахәы 2015 шықәса рзы иацлоит 598,05 мааҭ, 2016 шықәса рзы – 765,52 мааҭ, 2017 шықәса рзы – 1 519,23 мааҭ.
