АҞӘА, ԥхынҷкәын 29 — Sputnik, Бадраҟ Аҩӡба. Аԥсны адукатцәа Рпалата ахантәаҩы Иван Зарандиа иеиҭеиҳәеит Драндатәи СИЗО иҭаку рҭагылазаашьа ауадаҩра. Урҭ 15-20 минуҭ идәылыргоит неи-ааира, нас еиҭах рҭыԥқәа рахь идырхынҳәуеит, иҳәеит иара.
"Абахҭа – бахҭоуп. Уаҟа азинеиҿкаара ыҟазароуп, аха ахырҟьацәарагьы ҟалом. Ҳара иҳамам ариашара-усуратә колониа. Ауаа зегьы ҭакны иҳамоуп. Урҭ уа еилатәоуп", — иҳәеит Зарандиа.
Иара иазиԥхьаӡоит СИЗО аҟны иҟоу рҭынхацәеи ирзааигәоу ауааи дареи реибабара аанкылара ахьаԥыху даара ииашоуп ҳәа.
"Закәанла иҭаку ауаҩы мызкахь знык, ҩынтә иҭаацәеи иуацәеи иареи реиԥылара еиҿкаазароуп. Иара убасгьы имазароуп афатә аиура азингьы".
Ԥхынҷкәын 12 рзы Драндатәи СИЗО аҟны иҭакыз аҿагыларатә акциа мҩаԥыргеит. Иара мзызны иаман иҭаку рҟны зыҟазаара ҟамло амаҭәарқәа ахьрымырхыз. Аԥсны азинмчрақәа ирылдыршеит азинеиҿкаара аиқәыршәара.
Ԥхынҷкәын 26 рзы Аҩныҵҟатәи аусқәа рминистр Леонид Ӡаԥшьба, иааиуа аныҳәамшқәа азыԥхьагәаҭаны, аӡбра идикылеит СИЗО аҟны иҟоу рҭынхацәеи ирзааигәоу ауааи дареи реибабара аанкылара аԥыхзарц.
