АҞӘА, ԥхынҷкәын 31 — Sputnik, Бадраҟ Аҩӡба. Аԥсны Ахада Рауль Ҳаџьымба инапы аҵаиҩит Аԥсны аҭоурых-культуратә обиектқәа рсиа. Ари иаанагоит арҭ аобиектқәа азинтә хьчара роуеит, ус анакәха еиқәырхахоит, иҳәеит Аԥсны аҭоурых-культуратә ҭынха адепартамент аиҳабы Баҭал Кәабахьиа.
"Сара иазысыԥхьаӡоит ари иреиӷьу ҳамҭоуп ҳәа ашықәс ҿыцаз. Аҳәынҭқарраҟны абызшәеи аҵакырадгьыли инарываргыланы хра аманы иҟоуп акультура. Иахьанӡа Аԥсны аҭоурых-культуратә обиектқәа азинтә хьчара рымамызт", — иҳәеит Кәабахьиа.
Иара иазгәеиҭеит Аԥсны аҭоурых-культуратә обиектқәа рсиа аԥҵара ацхраараны иҟоуп урҭ реиқәырхара ҳәа.
"Ауаа ирдыруазароуп асеиԥш асиа шыҟоу. Урҭ рҩызцәа аҩнқәа ирыҩноу ауаа ирдыруазароуп аҭоурых-культуратә обиектқәа рахь ишаҵанакуа иахьынхо".
Кәабахьиа иажәақәа рыла асиа нагӡаҵәҟьаны еиқәыршәам, иалагалахараны иҟоуп аԥсахрақәеи ахарҭәаарақәеи.
"Ҳара, хышықәса рыҩныҵҟала асиа аинвентаризациа иахҳажьроуп. Иҟалашт иалаҳхуа, аха еиҳагьы еиҳахоит иалаҳгалараны изыхәҭоу", — иҳәеит иара.
Аԥсны аҭоурых-культуратә ҭынха адепартамент аиҳабы Баҭал Кәабахьиа иазгәеиҭеит асиа 1535 обиект алоуп ҳәа.
"Ҳара, хышықәса рыҩныҵҟала асиа иацаҳҵап ҳәа ҳгәыӷуеит 2500 обиект рыла" — иҳәеит иара.
Кәабахьиа иажәақәа рыла арахь иаҵаркхоит амемориалқәа, аҭоурыхтә паркқәа уҳәа ирацәаны аобиектқәа.
