АҞӘА, ажьырныҳәа 1 – Sputnik, Наала Аҩӡыԥҳа. Апроект "Ишьхатәылоу Аԥсны/Ашықәс аамҭақәа" аӡынтәи аекспедициа раԥхьаӡа акәны иалагоит ажьырныҳәамзазы. Абри атәы ҳзеиҭеиҳәеит Апроект "Ишьхатәылоу Аԥсны" автор Ҭенгьиз Ҭарба.
Ҭенгьиз Ҭарба 2016 шықәса раԥхьатәи амшқәа рзы игәҭакуп Аџьара, Мзы, Ацетук иара убас ашьхахыҵырҭа Чхы дазнеирц.
"Аекспедициа актәи ахәҭа мҩаԥысуеит ажьырныҳәа жәохә рҟынӡа. Аџьаратәи атурбаза инаркны ақәцәахь ихоуп сымҩа. Афото, авидео материалқәа еизызгоит. Уажәазы иманшәалан сышхалаша сшылбааша сазхәыцроуп", — иҳәоит Ҭарба.
Иара иажәақәа рыла ашәарҭадара аԥҟаррақәа дрықәныҟәалоит, имоу иԥышәагьы ихы иаирхәоит.
"Ашәаҩақәа рыла сныҟәалоит. Ишалшо ала ашәарҭадара аԥҟаррақәа срықәныҟәалоит. Избо-исаҳауа ҭысхлоит", — иҳәоит иара.
Ишьақәсыргыло амаршрутқәа ушьҭан атуристтә гәыԥқәа рхы иадырхәалашт, ҳәа азгәеиҭеит Ҭарба.
"Ишьхатәылоу Аԥсны/Ашықәс аамҭақәа" раԥхьатәи аекспедициа мҩаԥысит ҵыԥх, жәабранмзазы. Аекспедициаан иҭыхын афото, авидео материалқәа, имҩаԥган агидрологиатәи аметрологиатәи ҭҵаарақәа.
