АҞӘА, ажьырныҳәа 13 — Sputnik, Асида Кәыҵниаԥҳа. Аԥсны Арбџьар мчрақәа рхарҭәаара ҭагалантәи аплан нагӡахеит 98,7 рыла, ҳәа ҳкорреспондент илзеиҭеиҳәеит ареспублика арратә комиссар Ныгәзар Ҭыжәба.
"Арратә комиссариат аҟны аучот иқәгылаз аҿар ԥыҭҩык ареспублика анҭыҵҟа ишцазгьы ҭагалантәи арранаԥхьара маншәалан еиҿкаахеит уҳәартә иҟоуп", — иҳәеит Ҭыжәба.
Аполковник иажәақәа рыла арра инарыԥхьашаз аҿар зегьы ргәабзиаратә ҭагылазаашьа ишахәҭоу еиԥш иҟамызт азы урҭ аррамаҵзура рахыжьра алмшеит. Ус шакәугьы сынтәа ҵыԥх аасҭа еиӷьны ҳуснагӡатә еиҿаҳкааит иҳәеит Ҭыжәба.
Аԥсны Аштаб хада аиҳабы идҵала арра инарыԥхьо иахьынхо аҭыԥ иахьаҵанакуа акәымкәа егьырҭ араионтә арратә хәҭақәа рҟны аррамаҵзура иахыслароуп.
