АҞӘА, ажьырныҳәа 29 — Sputnik, Саид Барганџьиа. Иаарласны Аԥсны иаԥҵахоит аӡтәы спорт хыкқәа, ҳәа ҳаиҳәеит аспорти абаҩрҵәыреи рзы аҳәынҭеилакы ахантәаҩы ихаҭыԥуаҩ Идрис Кара Осман-оӷлы.
Иара иажәақәа рыла иахьазы имҩаԥысуеит Афедерациа анапхгаҩы изҵаара.
"Ҳара амшын иаԥну тәылоуп. Иҳамоуп аҭагылазаашьа бзиа асеиԥш иҟоу аспорт хкқәа рырҿиаразы", — иҳәеит аспорти абаҩрҵәреи рзы аҳәынҭеилакы ахантәаҩы ихаҭыԥуаҩ Идрис Кара Осман-оӷлы.
Иара иазгәеиҭеит аилак урҭ раԥҵаразы аусурақәа ишырҿу.
"Проблеманы иҳамоу аинфраструктура аҟамзаароуп. Уи ада аус ҳзуӡом", — иҳәеит иара.
Ахантәаҩы ихаҭыԥуаҩ иара убасгьы иазгәеиҭеит Аԥсны Ахада аминистррақәеи аусбарҭақәеи рҿаԥхьа ишықәиргылаз адҵа – аҿиара астратегиа аус адырулаларц.
"Ҳара ҳаҿуп 2016-2025шш. рзтәи аспорт аҿиара астратегиа аус адулара. Аԥсны аус руеит аспорт хкқәа 21 рҟынӡа. Астратегиахь иалаҳархәырц ҳагәҭакуп аӡтәы спорт хкқәагьы", — иҳәеит Кара Осман-оӷлы.
Иара иажәақәа рыла ақырҭуа-аԥсуа еибашьра ашьҭахь арҭ аспорт хкқәа аӡәгьы инапы рылакым.
"Атренертә еилазаара еиԥхьыттеит. Акадырқәа маҷуп. Ҳара ари аганахьала аусура ҳагәҭакуп аха уадаҩраны иҟоу аԥара амамзаароуп. Зегьы зыдҳәалоу ареспубликаҟны аекономикатә ҭагылазаашьоуп", — ҳәа еиҭеиҳәоит ахантәаҩы ихаҭыԥуаҩ.
Аҳәынҭеилакы ахаҭарнак иазгәеиҭеит азҵаарақәа зегьы шықәсык-ҩышықәса рыла ишыӡбамхо.
"Иахьазы раԥхьа иргыланы акадырқәа рызҵаара ӡбатәуп. Аибашьра ашьҭахь ари аусхк зынӡаск игәыгәҭажьын. Амшын аҟны ахәыҷқәа аӡсара дзырҵо ентузиастцәоуп", — иҳәоит иара.
Аспорти абаҩрҵәреи рзы аҳәынҭеилакы ахантәаҩы ихаҭыԥуаҩ Идрис Кара Осман-оӷлы дазааҭгылан иазгәеиҭеит аҳәынҭқарра аинфраструктура азҵаара азымыӡбар аӡытә спорт хкқәа ақьаад аҟны иаанхоит ҳәа.
