АҞӘА, жәабран 2 — Sputnik, Наала Аҩӡыԥҳа. Атәыла Ахада инапы зҵеиҩыз "Аҳәаанырцәтәи атәылауаа Аԥсны рыҟазаара азинтә ҭагылазаашьа" азы Азакәан иҳәаақәнаҵоит атәымтәылауаа рзы ара аанхареи, аусуреи, анхареи аусуреи рзы азин роуреи.
Атәыла Ахада Иусбарҭа аҳәынҭқарра-зинтә усбарҭа аиҳабы Давид Сангәлиа ишиҳәаз ала "Аҳәаанырцәтәи атәылауаа Аԥсны рыҟазаара азинтә ҭагылазаашьа" азы Азакәан аус адулара мҩаԥысуан жәшықәса инарзынаԥшуа.
Атәымтәылауаа рзинтә статус азы азакәан аԥҟарақәа инарықәыршәаны Аҳәынҭқарратә миграциатә маҵзураҟны атәымтәылауаҩ ирҭоит аамҭала анхаразы азин, ԥшьышықәса ҳәа аҿҳәара шьақәыргыланы. Азакәан иазыԥхьагәанаҭоит атәымтәылауаа ркатегориақәа 14 анхараз азин аиуразы. Арахь иаҵанакуеит аусура злымшо аха зыхшара Аԥсны иатәылауаау ахаҿқәа, Аԥсны Аҳәынҭқарраҟны аҵара зҵо мамзаргьы атәылазы иҷыдоу азанааҭ змоу ахаҿқәа.
Аамҭала анхараз азин аиуразы атәымтәылауаҩ еиқәиршәароуп абарҭ адокументқәа: аинфекциатә чымазара шимам, анаркотикатә маҭәашьарқәа шидимкыло, ВИЧ-инфекциа шимам шьақәзырӷәӷәо.
Азакәан аус адызулоз иалыркааит атәымтәылауаа ркатегориақәа ҩба – анхараз азин заур зылшо.
"Анхараз азин рыҭара алшоит атәымтәылауаа ркатегориақәа ҩба — Аԥсны Аҳәынҭқарра атәылауаҩ аҭаацәара и(илы)цалалаз. Урҭ аԥхьа аамҭала анхара азин роуеит нас – анхараз азин", — иҳәеит Давид Сангәлиа.
Азакәан аҟны ишарбо ала аҩбатәи акатегориахь иаҵанакуеит атәылауаҩра змам ахаҿқәа, Аԥснытәи АССР аҵакырадгьыл аҟны ииз, Аԥсны Аҳәынҭқарраҟны 1999 шықәса жьҭаара 12 инаркны иааиԥмырҟьаӡакәа Аԥсны аҵакырадгьыл аҟны инхо.
Азакәан иаланагалоит амиграциатә карта ҳәа ҳаиҳәеит Сангәлиа.
"Амиграциатә карта — Аԥсны аҵакырадгьыл ахь иаауа атәымтәылауаа рмиграциатә ҭаҩразы аҵакы аманы иҟоуп. Иахьазы иара алагалара аԥынгылақәа амоуп, убри инадҳәаланы иалагалахоит 2018 шықәса ажьырныҳәа 1 инаркны", — иҳәеит давид Сангәлиа.
Атәыла Ахада инапы зҵеиҩыз Азакәан инақәыршәаны Аԥсны визада изҭанеиааиуа атәылақәа ртәылауаҩцәа азин рымоуп аусуразы апатент аиура, егьырҭ — иҟоу аҭагылазаашьақәа зегьы рхархәарала.
Аԥсны Аҳәынҭқарра ахьыԥшымреи асуверинитети ирҿагыло, ареспублика ашәарҭара азҭо, Аԥсны жәлар Рџьынџьтәылатә еибашьра иалахәыз мамзаргьы аоккупациатә режим адгылара азҭоз Аԥсны анхареи аусуреи рзы азин ҟазҵо адокументқәа рыҭахом.
