АҞӘА, жәабран 11 — Sputnik, Саид Барганџьиа. Аԥсны афымцамч ахархәара еиҿырымкаар, аԥхьаӡагақәа ықәыдмыргылар, ашәахтәқәа рымшәалар ҩышықәса рышьҭахь Аԥсны фымцалашарада иаанхар алшоит, ҳәа иҳәеит ЗҲӘА "Егыр ГЕС" адиректор хада Леван Мебониа.
"Егыр ГЕС" атехникатә директор Гиа Хубуа иазгәеиҭеит заа асырӡ млеир аӡеизакырҭаҟны аӡы ахышәа-ҵышәа 420 метра рҟынӡа илаҟәыр алшоит ҳәа. Асеиԥш аан аинструкциа инақәыршәан афымцастанциа аусура аанкылазароуп.
"Агәыӷра ыҟоуп асырӡ хәажәкыра алагамҭаз алеира иалагап ҳәа. Аҳауатә ҭагылазаашьақәа маншәаламхар — мшаԥымза агәҭаны", — иҳәеит Хубуа.
Иара иазгәеиҭеит аҵыхәтәантәи ашықәсқәа рзы Аԥсны афымцамч ахархәара акыр ишеизҳаз, 100 процентк рҟынӡа ишнеиз.
Иара иажәақәа рыла аамҭа-аамҭала афымцамч арцәара иззыԥшыз алҵшәақәа аурыжьуам.
Мшаԥымза 15 аҿынӡа ареспубликаҟны имҩаԥыслоит афымцамч арцәара. АУН "Амшынеиқәафымцамч" ахаҭарнакцәа ишырҳәо ала асеиԥш ҟарымҵар ада ԥсыхәа амамкәа иҟалеит аӡеизакырҭаҟны аӡы ахьылаҟәыз иахҟьаны.
