АҞӘА, жәабран 17 — Sputnik, Асҭанда Арӡынԥҳа. Галтәи ашколқәеи ахәыҷбаҳчақәеи рҟны акарантин иацырҵеит жәабран 16 инаркны жәабран 25 рҟынӡа, ҳәа ҳзааицҳаит Гал араион Ахада Ҭемур Надараиа.
"Ҩымчыбжьа ицоз акарантин Галтәи араион аҟны аҭагылазаашьа ҭышәынтәалан иҟанамҵеит. Аимҳәа ашьҭахь ирацәаҩуп згәабзиара уаҩҵас ишьақәымгылац. Ақыҭақәа рҟны аҭагылазаашьа еиҳа еиӷьзар, ақалақь ахаҭаҟны макьаназ ауадаҩрақәа ыҟоуп", — иҳәеит Надараиа.
Уаанӡа, Гал араион Ахадара аофициалтә саит аҟны иарбан, араионтә хәышәтәырҭа аиҳабы Гьаргь Шониа иажәақәа рыла жәабран 1 инаркны 163-ҩык ачымазцәа ахәышәтәырҭахь инеиит ҳәа.
"Жәабран 1 инаркны 163-ҩык ачымазцәа ахәышәтәырҭахь инеиит ҽыхәышәтәра. Урҭ рҟынтәи 81-ҩык хәыҷқәан", — ҳәа азгәаҭоуп аҳәамҭаҟны.
Аԥсны ашколқәеи ахәыҷбаҳчақәеи рҟны акарантин рылаҳәан ажьырныҳәа 25 инаркны жәабран 15 рҟынӡа.
