АҞӘА, жәабран 19 — Sputnik, Владимир Бегунов. ИАР атәылақәа рҟынтәи Аԥсныҟа иаауа атуристцәа рхыԥхьаӡара акыр еиҵахоит, избанзар аӡәгьы иҭахым ахыргәаҟра, ҳәа азылыԥхьаӡоит аилахәыра "Дельфин" Краснодартәи атәылаҿацәи Аԥсны Аҳәынҭқарреи аҟәша анапхгаҩы Екатерина Чернова.
Лара лажәақәа рыла Аԥсны урыстәылатәи атуристцәа рзы аԥыжәара аманы иҟоуп аурысбызшәа азона иахьаҵанакуазгьы. Екатерина Чернова ишаҳзеиҭалҳәаз ала аилахәыра аклиентцәа рҟынтәи 5% заҵәык роуп Урыстәыла иатәылауаам. Урҭ Беларуссиа ма Украина иртәылауаауп. Иҟоуп Таджьыкисҭан, Узбекисҭан, Кыргызсҭан рҟынтәигьы атуристцәа, аха урҭ рхыԥхьаӡара маҷуп.
"Авиза зҭаххоны иҟоу атуристцәа Аԥсныҟа ацара мап ацәыркуа иалагоит", — лҳәеит лара.
Аилахәыра "7-тур" аҭира аҟәша аиҳабы Елена Алехина илҳәеит Аҟәаҟа ашәҟәы шырышьҭыз, авизақәа роура апроцедура амҩаԥысшьа аилкааразы "аха макьана аҭак ҳмоуц" ҳәа азгәалҭеит лара.
"Вербена Вел" адиректор Татиана Дудченко иаҳзеиҭалҳәеит лара лнаплакы аҿы ииасыз асезон аан Аԥсныҟа атур аазхәоз Урыстәыла атәылауаа ракәын, иҟан жәаҩык рҟынӡа беларусаа, аӡәык-ҩыџьак украинаа.
Атуроператорцәа ирҳәеит авиза зҭахны иҟало атуристцәагьы мап шырцәырымкуа, иҟоу аҭагылазаашьа шреилдыркаауа, Аԥсны Адәныҟатәи аусқәа рминистрра асаит аҟны аинформациа ныҭкааны ирбарц шрылшо. Аха атуроператорцәа иазгәарҭоит ауаа аус ргәагәара мап ацәыркыр шалшо, еиҳа имариоу егьырҭ атурқәа шалырхуа.
Аԥсны Аҳәынҭқарра азакәан "Аԥсны Аҳәынҭқарра алалареи алҵреи рзы аԥҟарақәа" инақәыршәаны 2016 шықәса мшаԥымза 1 инаркны иалагалахоит авизатә режим. Арахь иаҵаркхом Урыстәыла, Никарагуа, Тувалу, Аахыҵ Уаԥстәыла.
