АҞӘА, жәабран 26 — Sputnik, Асида Кәыҵниаԥҳа. Аԥснытәи аҳәынҭқарратә ҿартә театр аусура алҵшәа бзиақәа амоуп. 2015 шықәса рыҩныҵҟа араҟа иқәыргылахеит аспектакльқәа ԥшьба, лҳәеит атеатр арежиссиор Софа Агәмааԥҳа.
"Сезонк иалагӡаны аспектакльқәа ԥшьба ықәҳаргылеит. Уи акыр иуадаҩуп. Ҳара ҳахгьы ҳшаҭомызт, актиорцәа ҿарацәагьы ҳшаҭомызт. Уахи-ҽни аус аауан. Аха зегь раасҭа ихадоу – ҳџьабаа ҳԥылеит", — лҳәеит Софа Агәмааԥҳа.
Лара лгәаанагарала дарбанызаалак ауаҩы аҟазара илоуп. Актиор изы ароль аналухуа иудыруазароуп дасу илшо-илымшо.
"Апиеса аналаҳхуагьы ҳактиорцәа ҳрызхәыцуеит. Апиеса абзиара аасҭагьы ҳактиорцәа иара ахәмарра шԥарылшари ҳәоуп ҳашхәыцуа. Ҳактиорцәа Аԥснытәи аҳәынҭқарратә университет актиортә ҟәшоуп изылгаз. Изыԥсоу аадыруеит", — лҳәоит арежиссиор.
Аҿартә театр аспектакльқәа даара гәахәарыла ирыдыркылоит. Актиорцәагьы арежиссиорцәагьы ҳус ҳгәы ақәыбзиахоит абасеиԥш аан, лҳәоит лара.
Атеатр актриса Ирма Гәулуа лажәақәа рыла арежиссиорцәеи дареи аилибакаара бзиа рымоуп.
"Арежиссиорцәеи ҳареи ҳусеицура акыр иманшәалоуп. Ҳаззаҭгыло атемақәа реиҳарак арежиссиорцәагьы актиорцәагьы аинтерес ззеицрымоу темақәоуп", — лҳәоит лара.
2015 шықәса аҩныҵҟа атеатр иқәнаргылеит аспектакльқәа ԥшьба: Едуардо де Филлипо "Ауаҩи аамысҭашәеи", Антон Чехов "Амшә", Шоҭа Чкадуа "Ҳаԥсыуаауп, ҳара ҳаԥсыуаауп", Дырмит Гәлиа "Анаурқәа". Атеатр аԥҵан 2014 шықәса нанҳәа 20 рзы.
