АҞӘА, хәажәкыра 14 – Sputnik, Бадраҟ Аҩӡба. Хәажәкыра — аԥсуаа рмилаҭтә культура иахәҭаку ныҳәоуп, уи жәытә-натә аахыс иазгәарҭоит, лҳәеит аҵарауаҩ Цира Габниаԥҳа.
"Хәажәкыра, ажьырныҳәа ашьҭахь ааԥынразы иазгәарҭо раԥхьатәи аныҳәақәа ируакуп. Иара убас, хәажәкыра аԥсуа жәлар рмилаҭтә мшынҵа иахәҭакуп. Уи амшынҵа излаҳәо ала, хәажәкыра ааԥынра ааира, аҿара, аԥсҭазаара ԥхьаҟа ацара иазкуп", — ҳәа азгәалҭеит уи.
Ааԥынра быӷьпатын иақәыршәаны хәажәкыра мҩаԥыргоит, уи аԥсабара ԥхьаҟа ацара аиҭаҿиара иасимволуп, лҳәеит аҵарауаҩ.
"Убри инамадангьы ауаҩытәыҩса рыԥсҭазаараҿгьы аҿиара иадҳәалоуп ари аныҳәа. Аҭаацәа ҿыцқәа раԥҵара, аԥсҭазаара ԥхьаҟа ацара", — иацылҵеит лажәа Габниаԥҳа.
Хәажәкыра, даҽакала иашьҭоуп — анасыԥ аныҳәа ҳәа.
"Хәажәкыра ажәа ахаҭа иаҳәоит ахәажә кны аныҳәара ҳәа. Жәытәла, аԥсуаа аҩы кны иныҳәаӡомызт иркуаз ахәажә ауп. Хымԥада, аҩы атрадициа ду амоуп, аха ахәажә аҩы ҟалаанӡа ицәырҵыз ауп", — лҳәеит Цира Габниаԥҳа.
Ахәажә иагәыларҵо арасатә-ҵәы, анасыԥ-ҵәы ҳәа иашьҭоуп.
"Уи ҵакыс иамоуп, иааиз ааԥын ҿыц аизҳареи анасыԥи иртәны иҟаларц, аразҟы еилазҵо аҭаацәарақәа рацәахарц. Ахәажә аҵәы агәыларҵоит иааиз ааԥынра иаҳа аразҟы ззацу иеилкааразы. Ахәажәҵәы зауз сынтәатәи ашықәс иара изы мамзаргьы лара лзы имшхоит, насгьы аҭаацәара далалар ҟалоит ҳәа ирыԥхьаӡоит", — азгәалҭеит Габниаԥҳа.
Цира Габниаԥҳа лажәақәа рыла, хәажәкыра аиҳарак изызку аҿар роуп, аха аиҳабырагьы алахәны имҩаԥыргоит.
