Иааидкыланы Аԥсны 159 школ ыҟоуп, аҵара рҵоит 26 611-ҩык аҵаҩцәа. Урҭ рахьтә 5 Аҵара аминистрра анапаҵаҟа иҟоуп – урҭ 4-лицеи-интернатки аҟәатәи актәи абжьаратә школи роуп. Егьырҭ ашколқәа араионтә аҵара аҟәшақәа роуп хылаԥшра рызҭо.
Ареспублика ақалақьқәа рҿы 40 школ роуп иҟоу, егьырҭ ақыҭақәа рҿы иҟоуп, аха хыԥхьаӡарала ақалақьтә школқәа рҿоуп еиҳа аҵаҩцәа ахьыҟоу.
Ашколқәа х-типкны рҽыршоит: абжьаратә ҵара ахьрырҭо – 145 школ (1 инаркны 11класс аҟынӡа), ихыркәшам абжьаратә ҵара ахьрырҭо – 11 школ (1 инаркна 9 акласс аҟынӡа), алагарҭатә ҵара ашколқәа – 3 школк (1 инаркны 4 акласс аҿынӡа).
Ашколқәа рҿы аҵара мҩаԥыргоит хә-бызшәак рыла: аԥсышәала, аԥсышәалеи урысшәалеи, урысшәала, аерманшәала, қырҭшәала. Ареспубликаҿы аԥсуа школқәа 60 ыҟоуп, аԥсуа-аурыс школқәа 15, аурыс школқәа 47, аерман школқәа 26, ақырҭуа школқәа 11.
Милаҭла аҵаҩцәа еихшоуп абас: аԥсуаа – 14 234-ҩык, аурысцәа – 2 097, аерманцәа – 4 548, абырзенцәа – 119, ақырҭцәа – 4 743, егьырҭ амилаҭқәа – 879.
