АҞӘА, хәажәкыра 18 — Sputnik, Анжелика Бениа. Жәа-мз зхыҵуа Григори Гаидар қәҿиарала иизыҟаҵан аоперациа, иара иарыӷьарахьтәи ила акатаракта аман, абри атәы Sputnik акорреспондент илалҳәеит Акультуратә-гәыҳалалратә фонд "Ашана" ахаҭарнак Мактина Џьынџьалԥҳа.
Григори иан Анастасиа Пилиева лажәақәа рыла, аоперациа ф-сааҭк иреиҳаны ицон. Григори иарыӷьарахьтәи ила ацәцаш ԥсахын. Иқәра макьана иахьмаҷу иахҟьаны хәыҷык ҳицәшәон, аха зегьы маншәаланы имҩаԥысит.
"Аоперациа мҩаԥыргеит жәабран 26 рзы. Арҭ рҩызцәа аоперациақәа 30-40 минуҭ имҩаԥыргоит, аха иара иҿы ианыҟарҵоз иадхалеит, ацәцаш амхра хәыҷык иуадаҩхеит", — ҳәа лҳәеит ан.
Анастасиа Пилиева излаҳалҳәаз ала, рашәрамзазы илабара аиӷьтәразы еиҭа дгатәуп, анаҩсан аҳақьымцәа ирҳәоит илабара аҭагылазаашьа зеиԥшрахо атәы.
"Иара иаразнак еиҳа деиҭаҵуа далагеит, ҭыԥк аҿы дтәаӡам. Рызегьы аинтерес изрыҵоуп. Ибзиангьы иаҳауа далагеит, рашәарамзазы аблабара аиӷьтәразы еиҭа ҳцароуп, анаҩс аҳақьымцәа иблақәа 100% ирбалоит, ҳара асеиԥш иҟалоит ҳәа ҳақәгәыӷуамызт. Ҭабуп ҳәа раҳҳәоит ацхыраара ҟазҵаз зегьы. Сыҷкәын иахьа дыччоит, уи еиҳау иахьазы иҟаӡам сара сзы", — лҳәеит ан.
"Ашана" ахаҭарнак Мактина Џьынџьалԥҳа излаҳалҳәаз ала, иахьазы ахәыҷы иарыӷьарахьтәи ила 15% ауп иахьабо.
"Уамак ҵуам ҳара аоперациа азы аԥареидкылара хацҳаркиижьҭеи, иахьа ахәыҷы аоперациа қәҿиарала иизыҟарҵеит аблатә чымазаракәа рзы аҭҵааратә институт Гельмгольц ихьӡ зху аҿы", — лҳәеит Мактина Џьынџьалԥҳа.
Жәа-шықәса зхыҵуа Григори Гаидар аҭаацәараҿы аԥшьбатәи хәыҷуп, агәыҳалалратә фонд "Ашана" аԥареидкылара иалагеит ажьырныҳәамзазы. Жәабранымзазы иара аоперациа изыҟаҵан.
