Аиԥылара аҟны аԥсуа ҵасқәеи ақьабзқәеи ирызку ажәахәқәа рыла аҵарауаа гәыԥҩык ықәгылеит. "Жәларбжьаратәи афонд Аԥсны" ахада Сонер Гогәуа излазгәеиҭаз ала, аҳәынҭқарра аргылара аус аҿы аԥсуа ҵасқәеи ақьабзқәеи рызхьаԥшра аҭахуп.
"Зегь раԥхьаӡа бзиала шәаабеит ҳәа шәасҳәар сҭахуп аиԥылара иалахәу зегьы. Иахьа ҳҳәынҭқарра аргылараҿы зегь раԥхьа игылоу усуп ҳәа иҳаԥхьаӡоит аԥсуара. Ҳара ахақәиҭра змоу аԥсуа аҳәынҭқарра ҳаргылоит ҳҳәозар, зегь рхаҿы иҳаргылозар ауп ҳаԥсуара. Иахьа иаҳҳәар ҳалшома, ҳҵасқәеи ҳқьабзқәеи аԥсуа ҳәынҭқарра аполитикаҿ аума, аекономикаҿы аума аԥсуара хадара ауеит ҳәа? Ус иҟазар бзиоуп, аха иҟамзар, ҳаԥхьаҟа иҟаҳҵаша ҳалацәажәарц ҳаизеит", — ациҵеит уи.
Аҵарауаа рықәгыларақәа рыҟны ирзааҭгыланы иалацәажәеит аԥсуа ҵасқәеи ақьабзқәеи иахьа ахархәара ахьынӡарымоу атәы, насгьы аԥсуа жәлар рдунеихәаԥшра шьақәзыргыло аҵасқәа реиқәырхаразы иҟаҵатәу ашьаҿақәа.
