Зураб Џьапуа: аҵарауаа ҿарацәа ацхыраара раҳҭалоит

АҞӘА, хәажәкыра 31 – Sputnik, Бадраҟ Аҩӡба. Аԥсны ахадареи Аҭҵаарадыррақәа ракадемиеи аҵарауаа ҿарацәа ацхыраара рызҭо апрограмма аԥырҵеит, иҳәеит Аҭҵаарадыррақәа ракадемиа аиҳабы Зураб Џьапуа.

"2005 шықәсазы Жәлар Реизара иаднакылаз азакәан "Аҭҵаарадырреи, аҳәынҭқарратә ҭҵаарадырратә-техникатә политикеи" жәохәтәи ахәҭаҷ ишаҳәо ала, Аҭҵаарадырра академиа иаҵанакуа аинститутқәа аҳәынҭқарра абиуџьет аҟнытә х-процентк иреиҵамкәа аԥара роулар ауп, аха уи ахәҭаҷ иахьа уажәраанӡа анагӡара аимоуӡацт. Уи еиуеиԥшым аҭагылазаашьақәа ирыхҟьоит, зегь раԥхьа иргыланы, аҳәынҭқарра афинанстә ҭагылазаашьа хьанҭа ахьамоу азы. Уаанӡатәи Аԥсны ахадара ирҳәон аҭҵаарадырра иазоурыжьуа аԥара х-процентк инаӡоит ҳәа, аҳәынҭқарратә архив иазоурыжьуаз, абызшәа афонд иазоурыжьуаз аԥара алаҵазар ҳәа. Аха уи ҵабыргым, избанзар, азакәан ишану ала, аԥара ииасуазар акәын академиа иаҵанакуа аинститутқәа рахь", — азгәеиҭеит уи. 

Зураб Џьапуа излеиҳәаз ала Аԥсны иахьатәи ахадара ари аҭагылазаашьа еиҳа еилкаарала иазнеит. 

"Абаржәы, академиа аԥҟаԥҵәа шьақәҳаргылеит, лассы Аԥсны ахада инапы аҵаиҩраны дыҟоуп. Уи, академиа иаҵанакуа аинститутқәа зегьы рзакәан хада акәхоит. Аԥҟаԥҵәа ишьақәнарӷәӷәоит аҭҵаарадырра аԥара азшәашьа, егьырҭ азҵаарақәа. Убри инацҵаны, Аԥсны ахада идаҳгалараны ҳаҟоуп ақәҵара ҭижьырц, 2017 шықәса инаркны, аҳәынҭқарратә биуџьет аҟнытә х-процентк академиа аԥара азоунажьларц азакәан ишазгәанаҭо еиԥш", — ациҵеит уи.   

Зураб Џьапуа иазгәеиҭеит атәыла аиҳабыра академиа аԥара азшәара анырцәыуадаҩха, Апарламент аҿы аҭҵаарадырра мҩақәызҵо акомитет иеиҳабу адепутат Ахра Бжьаниа азҵаара аӡбара шидыргалаз.

"Иаргьы ҳаргьы ҳахшыҩ еилаҳҵеит, ҳагьазааит аҭҵааратә усумҭақәа агрантқәа рыҭара ала еиҿкаау апрограмма аԥҵара, аиҳараӡакгьы аҵарауаа ҿарацәа русумҭақәа. Араҟа иҟоуп аҭҵаарадырра азнеишьаҿы асистема ҿыц, убри сара сгәанала зегь реиҳа ихадароуп", — иҳәеит уи. 

Ас еиԥш аидеиа анцәырҵ, мышқәак рыла апрограмма еиқәршәан, аинститутқәа рҟынтәи апроектқәа еизган. 

"Анаҩс, апрограмма Аминистрцәа Реилазаара ирыдаҳгалеит. Иахьазы, уи анагӡашьа азҵаарақәа ӡбоуп, афинансқәа рминистрраҿы макьаназы еилкаамкәа инхоит, апрограмма анагӡара аан, аԥара азшәашьа асистема, аха акаҿы ҳазааип ҳәа аицәажәара ҳаҿуп. Ишыздыруа ала, инхаз мышқәак роуп Аминистрцәа Реилазаара апрограмма рыдыркыларазы", — ациҵеит Џьапуа

Академиа аиҳабы ишазгәеиҭаз ала, 2016 шықәсазтәи абиуџьет иалоуп апрограмма анагӡаразы аԥара. 

"Ҳара ирыдаагалеит 59 миллион рҟынӡа згараны иҟаз апроектқәа, аха аиҳабыра ирылшоз ала апрограмма иацхрааит, иагьоурыжьит 19 миллион мааҭ. Убри азы, апроектқәа рхыԥхьаӡарагьы еиҵахеит, иахьазы аа-проектк арбоуп. Аха рыцҳарас иҟалаз уи ауп, академиа иаҵанакуа аинститутқәа зегь арбамхеит сынтәа, иаҳҳәап, Аексперименталтә патологиеи атерапиеи ринститут, насгьы Афизико-техникатә институт. Аха аԥхьаҟа агәыӷра ҳамоуп урҭ рыпроектқәагьы алалап ҳәа апрограмма", — иҳәеит уи. 

Зураб Џьапуа игәы иаанагоит апрограмма аҭҵаарадырра иаҿу аҿарацәа рыстимул иацнаҵоит ҳәа. Апрограмма анагӡара азгәаҭоуп хы-шықәса ирылагӡаны.