ГАГРА, мшаԥы 3 — Sputnik, Саида Жьиԥҳа. Аԥсны аԥыза-министр Артур Амқәаб иахьа усутә визитла Гагра дыҟан, уи авизит азкын астадион аҟны имҩаԥысуа аремонттә-ргыларатә усурақәа хылаԥшра рыҭара.
Ишдыру еиԥш лаҵара 28 инаркны рашәара 8–нӡа, Аԥсны имҩаԥысуеит иазхаҵам жәаҩа ҳәынҭқарра рыбжьара ашьапылампыл асразы ConIFA адунеи ачемпионат. Ахәмаррақәа рымҩаԥгара азԥхьагәаҭоуп Аҟәеи Гагреи.
Убри инамаданы, атәыла анапхгареи Гагра араион Ахадареи ецхырааны ҿыц еиҭашьақәдыргылоит астадион.
Иахьа араҟа нап аркыуп, астадион Административтә хыбраҟны акапиталтә ремонт амҩаԥгара, адәи атрибунеи аҵакыра дгьыли реиҿкаара.
"Атәыла анапхгареи Гагра араион Ахадареи ҳаицхырааны еиҭашьақәҳаргылоит, Аԥсны Афырхаҵа Даур Ахвледиани ихьӡ зхыу астадион. Араҟа 2008 шықәса раахыс иарбанзаалак аремонттә усурақәа мҩаԥгамызт. Иахьа ҳнапы злаку аус ззынархоу ашьапылампыл асцәа аамҭа иашьашәало аҭагылазаашьақәа рзаԥҵареи, аҿар ари аспорт хкы радыԥхьалареи, ашьапылампыл абзиабаҩцәа рыдкылареи ауп. Агәра згоит ҳаззыԥшу адунеи ачемпионатгьы аҩаӡара ҳаракны ишымҩаԥысуа", — иҳәеит Гагра араион Ахадара аиҳабы Беслан Барцыц.
Атәыла анапхгараҟнытә Гагратәи астадион аиҭашьақәыргыларазы иазоужьуп хә-миллионк инарзынаԥшуа, араионтә биуџьет аҟнытә миллионк аԥара.
"Ашьапылампыл асразы адунеи ачемпионат аҳәаақәа ирҭагӡаны ахәмаррақәа Гаграгьы имҩаԥгазарц азаҳаӡбит. Ҳтәылауаа, ас еиԥш иҟоу аспорттә ныҳәа роурыжьыр иашам. Гаграҟа ашьапылампылтә хәмаррақәа рыхәаԥшразы аара рзыманшәалахоит Аԥсны мраҭашәаратәи ахәҭа иаҵанакуа араионқәа. Ишыжәбо еиԥш, иахьа араҟа аремонттә-ргыларатә усурақәа цоит. Ҷыдала сара хылаԥшра рысҭоит, сызлахәаԥшуа ала, иарбоу аамҭа, иалагӡаны ихырқәшахоит", — ҳәа азгәеиҭеит аԥыза аминистр Артур Амқәаб.
Астадион аҟны аремонттә-аиҭашьақәыргыларатә усурақәа мҩаԥызго аргыларатә фирма "Гагра строй Гранит" аиҳабы Нодар Хәарцкиа иажәақәа рыла, административтә хыбра иацҟаҵахоит аӡбаҩцәа руадеи, аконференц зали.
"Араҟа акапиталтә ремонт мҩаԥгахоит шьаҭанкыла. Иԥсаххоит афымцатәи аӡымҩангагатәи цәаҳәақәа. Ирҭбаахоит аҽыкәабарҭақәа, ашьышьмақәа, аҽеиҭакырҭа уадақәа. Иԥсаххоит ахыб, ашәқәа аԥенџьырқәа, еиҿкаахоит адәахьтәи аҭеиҭԥш. Атрибунаҟны ишьақәыргылахоит 1300 тәарҭа ҭыԥ. Ҳус иахьазы иманшәаланы ицоит, иаҳԥырхагоу ауадаҩрақәа ыҟам. Иазԥҵәоу арыцхә ҳҽахьаҳагӡоит", — ҳәа иациҵеит Хәарцкиа.
Астадион административтә хыбра акапиталтә-аиҭашьақәыргыларатә усурақәа ирықәырӡхо ахарџь рхахьы иргоит атәыла анапхгара. Гагра араион Ахадара рымчала еиҿкаахоит адәы, атрибуна, аҵакыра дгьыл.
