АҞӘА, мшаԥымза 6 — Sputnik, Роберт Џьапуа. "Аԥсни Аахыҵ-Уаԥстәылеи рыбжьара визада аиҭанеиааиразы Аиқәшаҳаҭра аратификациа азуразы" Аԥсны Азакәан Апарламент адепутатцәа аҵыхәтәантәи аԥхьарала ирыдыркылеит.
Атәыла Ахада Апарламент аҟны ихаҭарнак Дмитри Шамба иажәақәа рыла, Аиқәшаҳаҭра рыдкылоуп хәышықәса ҿҳәарас иаҭаны, наҟ-наҟтәи ацҵарақәа алыршоны.
"Аиҳабырабжьаратә Еиқәшаҳаҭра инақәыршәаны аҳәынҭқаррақәа руак атәылауаа ирылшоит егьи аҳәынҭқарра аҵакырадгьыл алалара визада, рхаҭара шьақәзыргыло адокументқәа рыла", — иҳәеит иара.
2015 шықәса рашәарамза 30 рзы Аԥсны Аминистрцәа Реилазаара ишьақәнарӷәӷәеит Аԥсны Адәныҟатәи аусқәа рминистрра ажәалагала, Аԥсны атәылауааи Аахыҵ-Уаԥстәыла атәылауааи рыбжьара визада аиҭанеиааиразы Аиқәшаҳаҭра анапаҵаҩраз.
2015 шықәса, нанҳәамзазы Аԥсны Адәныҟатәи аусқәа рминистрра аделегациа официалтә визитла Аахыҵ Уаԥстәыла иҟан. Авизит иалҵшәахеит Аԥсны атәылауааи Аахыҵ-Уаԥстәыла атәылауааи визада реиҭанеиааиразы Аԥсни Аахыҵ Уаԥстәылеи Реиҳабырақәа рыбжьара Аиқәшаҳаҭра анапаҵаҩра.
