АҞӘА, мшаԥымза 7 — Sputnik, Асҭанда Арӡынԥҳа. Адунеи иқәу ақырсианцәа зегьы аԥшьаша, мшаԥымза 7 рзы иазгәарҭеит Иԥшьоу Анцәаиан лажәабжь бзиа аныҳәа. Аԥсны ақьырсианцәагьы ари аныҳәа азгәарҭоит. Аҟәатәи акафедралтә уахәамаҟны имҩаԥган аныҳәатә литургиа. Иара мҩаԥигон Аԥсуа иашахаҵаратә уахәама аиҳабы, аиереи Виссарион (Аԥлиа).
Абри амш аҽны Анцәа дхазҵо иргәаладыршәоит Мариа архангел Гавриил дшылҭааз, уи Иаса Қьырса длоураны дшыҟоу азы ажәабжь бзиа шиҳәаз.
Аб Виссарион ишиҳәаз ала ари аныҳәа Аҟәатәи ауахәамазы иҷыдоу аҵакы амоуп.
"Адунеи ақырсианцәа зегьы рзы аҵак ду змоу ныҳәоуп иахьа. Иара убасгьы ари аныҳәа Аҟәатәи ауахәамазы иҷыдоу аҵакы амоуп, избанзар ҳуахәама абри аныҳәоуп изызку. Анцәа иҳәааит ажәабжь бзиа еснагь адунеи иаҭаауа, ҳаԥсуа дгьыл иқәыҩуа", — иҳәеит аиреи Виссарион.
Ажәабжь бзиа аныҳәа ауахәамазы Мшаԥи Қьырсеи рышьҭахь ахадара змоу ныҳәоуп, иреиҳаӡоу жәаҩа ныҳәа ируакуп.
Ажәабжь бзиа аныҳәа азгәарҭоит Қьырсанӡа жәымз шыбжьоу, Ачгара ду аԥшьбатәии ахԥатәии амчыбжьқәа ирыбжьаркуеит.
