АҞӘА, мшаԥымза 13 – Sputnik, Анжелика Бениаԥҳа. Жәларбжьаратәи апроект "Аԥсуааи адыгақәеи рыԥшьаҭыԥқәа: атрадициақәеи ҳаамҭеи" аҳәаақәа ирҭагӡаны Аҟәа, Аҳәынҭқарратә музеи аҟны аҩаша, мшаԥымза жәаҩа рзы иӡырган еизгаз аматериалқәа ирылху ашәҟәы.
Ашәҟәы аиқәыршәаҩцәа ируаӡәку, апрофессор Алла Соколова лажәақәа рыла ашәҟәаҟны ицәыргоуп аматериал ҿыцқәа, иаҳцәыӡхьоу ақьабызқәеи аҵасқәеи ирызкны.
"Аусура уажәоуп ҳаналага. Апроект иҳаднагало рацәоуп. Аԥсны аԥшьаҭыԥқәа ашәҟәы иҭагалоуп. Ҩышықәса рыла ҩ-шәҟәык ҭыжьын, имҩаԥган аконференциақәа, астол гьыжьқәа", — лҳәеит лара.
Ашәҟәы авторцәа ируаӡәку Гарик Сангәлиа, археолог, аҭоурыхдырыҩ, иазгәеиҭеит аԥсуа наукаҟны Аԥсны аматериалтә культура аҭҵаара аҭоурых ду шамоу. Иара иажәақәа рыла ашәҟәы "Аԥсуааи адыгақәеи рыԥшьаҭыԥқәа: атрадициақәеи ҳаамҭеи" Аԥсны аҭоурых азы аҵак ду аиуеит.
"Ақьырсиан баҟақәа еиҳа иныҭкааны иҭҵаазар, ажәытә динтә баҟақәа ртәыҳәа рацәак ҳаздырам. Апроект аҳәаақәа ирҭагӡаны абри аусура акәын ҳазҿыз. Сгәы иаанагоит аусурақәа ԥхьаҟагьы ирыцлап ҳәа. Аусурақәа ирыдыԥхьалатәуп археологцәа. Аԥсны аинформациа рацәа амоуп", — иҳәеит Сангәлиа.
Ашәҟәаҟны еизго аматериал ҩбаны еихшоит: аԥшьаҭыԥқәа ржәытәи рҿатәи ҳәа. Ирацәоуп ауникалра злоу аинформациа.
Урыстәылатәи агуманитартә наукатә фонд адгылара знаҭаз Жәларбжьаратәи апроект "Аԥсуааи адыгақәеи рыԥшьаҭыԥқәа: атрадициақәеи ҳаамҭеи", аҳәаақәа ирҭагӡаны Аҟәа, Аҳәынҭқарратә музеи аҟны аҩаша, мшаԥымза жәаҩа рзы иӡыргаз амонографиа аматериалқәа аҭҵаарақәа раан еизган.
Амонографиа рзырхоуп акультурологцәа, аҭоурыхдырыҩцәа, аетногрофцәа, атәылаҭҵааҩцәа, иааидкыланы Кавказ акультура ҭызҵаауа.
Ашәҟәы аидкылареи аҭыжьреи алыршахеит Урыстәылатәи агуманитартә наукатә фонд, Дырмит Гәлиа ихьӡ зху агуманитартә ҭҵаарақәа ринститут, Тембот Керашев ихьӡ зху агуманитартә ҭҵаарақәа Адыгатәи ринститут, Адыгатәи аҳәынҭқарратә университет рыцхыраарала.
