АҞӘА, мшаԥымза 15 — Sputnik. Аԥсни Қырҭтәылеи рыбжьара ацҳақәа хәба рҟынтәи акы адыркит. Абри атәы иҳәеит Гал араион Ахада Ҭимур Надараиа.
Надараиа иажәақәа рыла анхарҭа Ҭаглан аҟны ахәаша иадыркит аушьҭырҭатә пункт.
"Аԥсни Қырҭтәылеи рҳәынҭқарратә ҳәаа аркра ҳагәҭакӡам, еиҵаҳтәуа аушьҭырҭатә ҭыԥқәа роуп. Аԥсни Қырҭтәылеи рыбжьара ацҳақәа хәба рҟынтәи акы адыркит. Изадыркызгьы ацҳакнаҳа аныҟәаҩцәа рзы ашәарҭара аҵан, ихәарҽхахьан", — иҳәеит Надараиа.
Уи адагьы иара иазгәеиҭеит аушьҭырҭа цҳа хада ада егьырҭ аҭыԥқәа раркра ишадгылаҩцәаз атәыла иахьатәи анапхгара.
2016 шықәса мшаԥымза 15 рзы Аԥсны аиҳабыра ирыдыркылеит аӡбра анхарҭа Ҭаглан иҟоу Егры иху ацҳа аркразы. Аӡбра иара амш аҽны инагӡан. Абри атәы аҳәоит атәыла Ахада исаит аҟны.
