АҞӘА, мшаԥымза 20 — Sputnik, Роберт Џьапуа. Ауаажәларратә еилазаареи ауаажәларратә дипломатиеи рроль иалацәажәараны иҟоуп Шәача мшаԥымза 19-20 рзы имҩаԥысуа Аусеицураз Шанхаитәи аиҿкаара жәларбжьартәи афорум алахәылацәа. Афорум исасцәаны иҟоуп Аԥснытәи аделегациа. Абри атәы ҳкорреспондент иеиҳәеит атәыла Ахада ихаҭарнак ҷыда Даур Ақаҩба.
"Аԥсны абри аҩыза афорум алахәра ианаҭоит алшара иԥиоу аиныррақәеи аимадарқәеи рзы, еиҳа инарҭбааны адунеи аҟны иҟоу аҭагылазаашьа абаразы", — иҳәеит Ақаҩба.
Атәыла Ахада ихаҭарнак ҷыда иара убасгьы иазгәеиҭеит афорум алахәылацәа рхыԥхьаӡара 300-ҩык рҟынӡа шыҟоу.
Афорум амҩаԥгара иаԥшьгаҩны иҟоуп Урыстәыла ауаажәларратә палатеи ИАР атәылақәа Ринститути. Афорум иалахәуп ИАР атәылақәа Ринститут адиректор Константин Затулин, Ауаажәларратә палата амаӡаныҟәгаҩ Александр Бречалов, Урыстәыла Ахада иабжьгаҩ Сергеи Глазиев.
Аԥсуа делегациа иалахәын иара убасгьы АҬР аиҳабы Олег Дамениа, атәыла Ахада ихаҭыԥуаҩ иабжьгаҩ Одиссеи Бигәаа, Аԥсны иҟоу Урыстәылатәи Афедерациа Ахәаахәҭратә хаҭарнакра амаӡаныҟәгаҩ Роман Риазенцев.
АША (ШОС) иалахәылоуп Урыстәыла, Ҟазахсҭан, Китаи, Ҭаджикисҭан, Узбеқсҭан, Киргизиа, наԥшыҩцәак рыҳасабала – Монголиа, Беларуссиа, Индиа, Пакистан, Иран, Афганистан.
