АҞӘА, мшаԥымза 25 – Sputnik, Анжелика Бениаԥҳа. Олимпиатәи ахәмаррақәа рҟны араӡынтә призиор Саида Гәынԥҳа лаԥхьахә аиуразы Атлетика лас азы иаарту ареспубликатә турнир мҩаԥысит асабша, Аҟәа ақалақь аҟны. Атурнир апрограмма раԥхьаӡа акәны иалагалан аҵәыршәра, лҳәеит аицлабрақәа рыӡбаҩ хада Лолита Назарс.
"Саида Гәынԥҳа лџьабаала илыллыршеит Аолимпиатә хәмаррақәа рыҽрылархәра. Уи даара акраҵанакуеит. Алахәра адагьы уаҟа аԥхьахә агара – уи зынӡа ишьахәуп. Сгәыӷуеит абри атурнир ашьҭахь аҵәыршәра аинтерес ркып ҳәа ҳҿар", — лҳәоит Назарс.
Атурнир иалахәын Гагра, Гәдоуҭа, Аҟәа рҟынтәи аспортсменцәа ҿарацәа.
Атурнир алагамҭаз алахәылацәа ирзаԥхьеит Олимпиатәи аспортсменка Саида Гәынԥҳа лаашьҭымҭа шәҟәы. Лара лгәымбзиара иахҟьаны атурнир аҭаара лылымшеит.
"Абаҩырҵәыреи аспорти, аҵара бзиеи ҳажәлари ҳҳәынҭқарреи ԥхьаҟа еиззырҳауа ракәны иҟоуп. Иҭабуп сахьышәгәалашәо. Зегь агәыбзиареи аманшәалареи шәзеиӷьасшьоит", ҳәа аҳәоит аацҳамҭаҟны.
Аҵәыршәразы Саида Гәынԥҳа лыхьӡ зху ахраҿа лгеит аспортсменка қәыԥш Сабрина Мамед-оӷлы.
Аҷкәынцәа рыбжьара аиааира игеит Дауҭ Царгәыш. Иара иажәақәа рыла абри атурнир аҟынӡа иара Саида лыӡбахә издырамызт.
"Сара уаанӡа анапылампыл акәын зинтерес сымаз. Аҵәыршәра даара исгәаԥхеит. Иҟалап ԥхьаҟагьы иараҿы саанхар. Саида Гәынԥҳа лакәзар илзеиӷьасшьоит агәыбзиара", — иҳәеит иара.
Азыҟаҵаҩ Лолита Назарс иазгәалҭеит ареспубликаҟны атлетика ласы аҿиара лаҟәуп ҳәа.
Жәларбжьаратәи акласс аспорт азҟаза, ХХII Москватәи Аолимпиатә хәмаррақәа рпризиор Саида Гәынԥҳа диит цәыббра 30 1959 шықәса рзы Пицунда.
Атлетика лас ахь днеиит 1974 шықәса рзы. Зыҟаҵаҩцәас илыман Михаил Каракеиани Илиа Гигаурии. Атлетика ласы азы СССР акоманда даларҵеит 1977 шықәса рзы.
1978 шықәса рзы — Рига, СССР ақәыԥшцәа рыбжьара аԥхьахә лгеит. 1979 шықәса рзы – СССР жәлар аԥхынтәи рспартакиада ачемпионка.
1978 шықәса рзы СССР ачемпионка. 1979 шықәса рзы – Нидерланды, Европа акубок афиналбжа аиааиҩы.
1989 шықәса рзы Токио, аиндаҭларақәа рҟны аиааира лгеит. 1980 шықәса рзы, Аолимпиатә хәмаррақәа рҟны Саида аҵәы лыршәит 67, 76 метра. Аҩбатәи аҭыԥ аанылкылеит.
