АҞӘА, лаҵарамза 5 – Sputnik, Саид Барганџьиа. Аԥсуа автоеиԥхнырҩы Дмитри Ӷәазаа FORMULA 1 Гран-при аҳәаақәа ирҭагӡаны Шәача имҩаԥысуаз аицлабрақәа рҟны аабатәи аҭыԥ ааникылеит.
Иара иҳаиҳәеит F1 аҳәаақәа ирҭагӡаны ҩ-еицлабрак шымҩаԥысыз.
Актәи аиԥхныҩлара аихшьаалақәа рыла мшаԥымза 28 рзы афиниш ахь инеиит 14-ҩык алахәылацәа.
"Сара сазыҟаҵан аха аҵҟьамҭаз сеиҵахеит, амашьынақәагьы саҩсыжьит. Евгени Ружеиниковы сареи ҳаиндаҭлеит. Лассрыла сара сеиҳан аха атактикатә знеишьала иара исаԥигеит избанзар сара сыццакра сақәгәыӷын амашьына сцәыцәеит. Аамҭа сыцәцеит", — иҳәеит иара.
Иара иажәақәа рыла ццакрыла илшон раԥхьатәи ахҩык дрылашәар аха иԥышәа амаҷра иԥырхагахеит.
Аҩбатәи амш азы аихшьаалақәа рыла Дмитри д-аабатәхеит.
"Сыҵҟьашьа бзиан. Аиҿагылара ӷәӷәа мҩаԥысуан. Исывагылан инеиуази сареи ахаҵәирҭа ҳаҩҟьеит. Атрасса анҭыҵ ҳаинҟьеит", — иҳәоит иара.
Уигьы аамҭа агеит.
"Амашьынақәа реинҟьара аеродинамика аруашәшәыреит.. Иҵегь исырццакыр ауамызт. Аабатәи ҳәа снеиит ахыркәшарахь".
Дмитри иазгәеиҭеит еиҳау алҵшәақәа ааирԥшыргьы шилшоз.
"Иҟалаз ҵарак исзаҩызоуп, иԥышәоуп. Сгәы иаанагоит ушьҭантәи аицлабрақәа раан аҽакала иҟалап ҳәа", — иҳәоит Ӷәазаа.
Саид Каралов, аицлабра ахәаԥшыҩ иҳәеит Аԥснынтәи Дмитри идгылаҩцәа шырацәаҩыз.
"Димеи сареи ҳхәыҷаахыс автоспорт ҳазгагоуп. Даара сеигәырӷьоит Дима абарҭ аицлабрақәа дрылахәхартә аҭагылазаашьа ахьиоуз. Аԥснынтәи Дмитри идгылаҩцәа рацәан", — иҳәеит Каралов.
Саид иазгәеиҭеит атрасса акыр ишыуадаҩыз.
Класс Mitjet 2L Франциа ацәыргахеит 2012 шықәса рзы. Иахьа Mitjet 2L акыр ирылаҵәоуп Франциа, Италиа, Германиа, Урыстәыла, США. Аиндаҭларақәа ирылахәхоит 40 машьына рҟынӡа.
Асерии Mitjet дашьаҭаркҩуп Франциатәи аспортсмен Жан-Филипп Даиро. Урыстәыла асерии Mitjet апромоутерс иҟоуп аилахәыра Arctic Energy.
MITJET 2L акласс иатәу автомашьынақәа рымчхара 260 ҽы-мчы ыҟоуп, рыкапан 750 килограмм ыҟоуп, абылтәыҭра ахышәа-ҵышәа 37 литра.
