Sputnik акорреспондент Владимир Бегунов абри аганахьала аусеицурақәа шымҩаԥысуа ртәы иалҳәеит Аҟәа Ахадара жәларбжьаратәи аимадарақәа рыҟәша аиҳабы ихаҭыԥуаҩ Ирина Шониаԥҳа.
- Ирина Анатоли-иԥҳа, Аҟәа ақалақь-еишьцәа ԥшьба амоуп: шотландиатәи Килмарнок, ҭырқәтәылатәи Адаԥазары, Бырзентәылатәи Ахарне, гваделупатәи Пуент-А-Питер. Урҭ рыдагьы – ақалақь-партниорқәа жәпакы. Абри атәы аҳәоит Ахадара асаит аҟны. Урҭ еиуеиԥшымрас ирымозеи?
— Еиԥшымзаара рымам. СССР аҵакырадгьыл аҟны иҟоу ақалақьқәа ақалақь-партниорқәа ҳәа ҳрышьҭоуп, ахара дгьылқәа рҟны иҟоу ақалақь-еишьа ҳәа. Урҭ зыӡбахә шәҳәаз ақалақьқәа зегьы еицырдыруеит избанзар ираԥхьатәиқәоуп. Дареи ҳареи ҳабжьара аиқәшаҳаҭрақәа мҩаԥган асовет аамҭақәа раан. Аиқәшаҳаҭрақәа ҳабжьоуп Краснодар, Черқьесск, Архангельск, Степанокерт, Улан-Уде, Тирасполь, Сан-Антиоко уҳәа ақалақьқәеи ҳареи. Уажәы архиара ҳаҿуп аҽа ԥшь-қалақьки Аҟәеи рыбжьара аиқәшаҳаҭрақәа.
- Асеиԥш иҟоу аиқәшаҳаҭрақәа иҳарҭои?
— Аиҳарак–аспорттәи акультуратәи программақәа ҳхы рылаҳархәуеит. Иҟоуп ақалақьқәа Аԥсны еиҳа иуадаҩыз аамҭақәа раан ацхыраара азҭоз. Иаҳҳәап: Килмарнок. Килмарнок игылоуп ақырҭуа-аԥсуа еибашьра иалаӡыз рбаҟа, Аҟәа иҟоуп Шотландиа захьӡу амҩаду. Адаԥазары акәзар аамҭақәак раԥхьа ахымхәацәа рыцхырааразы агуманитартә еидара аанашьҭит. Ҳара ҳганахь ала, иаҳҳәап Пицунда аԥхын ахәыҷқәа рыԥсшьара еиҿнакаауеит.
- Аҟәа 2500 шықәса ахыҵра амҩаԥгараан атәымҳәынҭқарратә делегациақәа ҳарзыԥшума?
— Урыстәылатәиқәа хымԥада иҟалоит. Инахароу атәылақәа рҟынтәи макьаназы ҭырқәтәылатәи аделегациоуп ҳаззыԥшу. Урҭ ауснагӡатәқәа рхы шрыладырхәуа азгәарҭахьеит.
