АҞӘА, лаҵарамза 19– Sputnik. Азиа-Аокеанҭынч арегион иатәу атәылақәа ахәбатәи Красноиарсктәи жәларбжьаратәи рмузыкатә фестиваль аҳәаақәа ирҭагӡаны имҩаԥысраны иҟоуп адунеи аҟны еицырдыруа аоператә шәаҳәаҩы, "Ахьтәы сопрано", афестиваль асас хада Хьыбла Гьерзмааԥҳа лконцерт. Абри атәы аанацҳаит апортал yarsk-info. ru.
Аконцерт мҩаԥысраны иҟоуп ақалақь амш аҽны, рашәарамза 25 рзы.
Раԥхьаӡа акәны Азиа-Аокеанҭынч арегион иатәу атәылақәа ахәбатәи Красноиарсктәи жәларбжьаратәи рмузыкатә фестиваль мҩаԥысит 1992 шықәса рзы.
Хьыбла Гьерзмааԥҳа Аԥсны Жәлар рартистка, Урыстәылатәи Афедерациа Жәлар рартистка, еиуеиԥшым жәларбжьаратәи аконкурсқәа "Вердиевские голоса" (Буссето, Франсиско Виниас ихьӡ зху аконкурс (Барселона), Римски-Корсаков ихьӡ зху аконкурс (Санкт-Петербург) жәпакы рлауреат.
Хьыбла лмузыкатә кариера хацыркхеит П.И. Чаиковски ихьӡ зху Х жәларбжьаратәи аконкурс аҟны Гран-при анланашьаха инаркны.
Хьыбла Гьерзмааԥҳа иланашьоуп атеатртә премиақәа: "Золотая маска", "Золотой Орфей", "Лучшая певица", Casta Diva, алитературеи аҟазареи русхк аҟны Москва апремиа. Хьыбла дықәгылахьеит адунеи иреиӷьу асценақәа: Петербургтәи Мариинтәи атеатр, Аоператә театр Ковент Гарден (Лондон), Метрополитен Опера, Венскаиа Штатсопер уҳәа рҟны.
