АҞӘА, лаҵарамза 30 — Sputnik, Роберт Џьапуа. Ирактәи Кәырдисҭани Секеитәи атәылаҿацәи ркомандақәа еицыхәмарит ConIFA 2016 аҳәаақәаа ирҭагӡаны. Ирактәи Кәырдисҭан акоманда аиааира агеит.
Ахәмарра мҩаԥысуан астадион "Динамо" аҟны. Актәи ампыл ҭаршәын 22 аминуҭ азы. Аҩбатәи — 56 минуҭ рзы. Ахԥатәи — 73 рзы. Ахәмарра хыркәшахеит 3:0 ҳәа.
Ахәмарра ашьҭахь Кәырдисҭан акоманда азыҟаҵаҩ хада Хасроу Гурун иҳәеит раԥхьатәи аиааира аҵакы дууп ҳәа.
Акоманда амениџьер Шуан Рауф иазгәеиҭеит акоманда егьырҭ ахәмаррақәагьы ишырзыхиоу.
Аҟәатәи ашьапылампылтә клуб "Динамо" аиҳабы Астамур Адлеиба иазгәеиҭеит Кәырдисҭан акоманда атурнир аҟны фаворитны ишыҟоу.
Арҭ аҩ-командак рнаҩс агәыԥ "В" ахь иаҵанакуеит Иапониатәи акорееццәа ркоманда.
Ирактәи Кәырдисҭан автономиа аиуит 1970 шықәса рзы. 2005 шықәса рзы уи шьақәырӷәӷәахеит.
Секеитәи атәылаҿацә иазхаҵам милаҭтә автономиоуп. Иахьатәи Румыниа аҵакырадгьыл аҟны иҟоуп.
