Владислав Арӡынба ихьӡ зху Аибашьратә фырхаҵара аҳәынҭқарратә музеи аҿы Аԥсны Аҳәынҭқарра аҩбатәи Ахада Сергеи Багапшь игәалашәара аҳаҭыраз афотоцәыргақәҵа аартын иахьа, лаҵарамза 29 рзы. Афотоцәыргақәҵа иалахәын Аԥсны анапхгара, Сергеи Багаԥшь иҭаацәа, иҩызцәа, ауаажәларратә усзуҩцәа.
Аԥсны Аҳәынҭқарра аҩбатәи Ахада Сергеи Багаԥшь иԥсҭазаара далҵижьҭеи хәы-шықәса аҵра азгәаҳҭоит абри ацәыргақәҵа аартрала. Иара игәалашәара ажәлар ргәаҵаҟны иҟоуп иахьагьы, ҳәа лҳәеит ацәыргақәҵа аартуа амузеи аиҳабы Мзиа Беиаԥҳа.
"Владислав Арӡынба ихьӡ зху Ахьӡ-аԥша амузеи аҿы ицәыргақәҵоуп Сергеи Багаԥшь иполитикатә мҩеи иџьабааи ртәы зҳәо ифотосахьақәа. Аԥсны аҳәынҭқарра ахадара ихацдыркит ари ацәыргақәҵа аиҿкаара, ҳара уи ҳавагылеит, иҳаӡбеит абасала игәаларшәара азгәаҭара", — ҳәа лҳәеит Мзиа Беиаԥҳа.
Сергеи Уасил-иԥа Аԥсны аҭоурых иҿыцу адаҟьақәа аазыртыз политикуп. Владислав Арӡынба дивагыланы иахьатәи аԥсуа ҭоурых рчаԥеит. Ацәыргақәҵа иаҭааз асасцәа афотосахьақәа иргәаланаршәоз рацәан. Иара иԥсҭазаара атәы зҳәоз афотосахьақәа рацәан. Иара ивагылаз иҩызцәа аполитикцәа, инаигӡоз аус, ижәлар дшырзыҟаз абарҭкәа зегьы аныԥшуеит ари ацәыргақәҵа.
Аԥсны аҳәынҭқарра аҩбатәи ахада Сергеи Багапшь игәаларшәара аҳаҭыраз иаарту афотоцәыргақәҵа еиднакылоит 60 фото, урҭ рахьынтә 45 дравторуп афотоҭыхыҩ Владимир Попов. Ацәыргақәҵа аартызаауеит мызкы.
