Бадраҟ Аҩӡба, Sputnik
Ашьапылампыл азы адунеитә чемпионат ConIFA атранслиациақәа ррежисиор хада Даур Логәуа иԥа Шабаҭ Логәуа Аԥсны еизгоу акомандаҟны дыхәмаруеит. Иԥа даныхәмаруа иоуа ацәаныррақәа ртәы даҳзалацәажәоит Даур Логәуа.
"Аԥсны еизгоу акомандаҿ дыхәмаруеит сԥа, Шабаҭ Логәуа. Ҳәарада исцәыуадаҩуп. Аха анцәа иџьшьаны макььаназ сирԥхашьом", — иҳәоит Даур.
Даур Логәуа акыршықәса ҵуеит Аԥсуа телерадиоеилахәыраҟны аус иуеижьҭеи, аха асеиԥш атранслиациақәа мҩаԥимгацызт.
"Аԥсны ачемпионат мҩаԥгахарц азы аӡбра анрыдыркыла ашьҭахь иқәгылеит уи атранслиациа азура азҵаарагьы. Аԥсуа телерадиоеилахәыра уи азы иахәҭоу атехника амам, убри азы Урыстәылантәи арендла иаагеит", — иҳәоит иара.
Атехника адагьы Аԥсныҟа иааԥхьан уи амаҵ азызуа аперсонал. Урҭ уаанӡа Шәача имҩаԥысуаз Аолимпиатә хәмаррақәеи егьырҭ еиуеиԥшым апроектқәеи рымаҵ руан.
ConIFA еиԥшу аусмҩаԥгатә амаҵ азура Аԥсназы иҿыцу ԥышәоуп.
"Ашьапылампыл хәмарра аҭыхра иара ахатәы ҷыдарақәа амоуп, ахатәы технологиеи аметодикеи амоуп. Акамерақәа ааба рҟынӡа ҳхы иаҳархәоит", еиҭеиҳәоит Даур.
Даур Логәуа иазгәеиҭеит атехникатә гәыԥ аԥхьатәи ахәмарраан аҭыԥ змаз агхақәа шдыриашаз.
"Аҷкәынцәа рус рнапахьы ибзианы иааргеит. Жәларбжьаратәи астандартқәа ҳрықәшәо аус аауеит ҳәа ҳарҳәеит москватәи ҳколлегацәа", азгәеиҭоит Даур.
Ахәмаррақәа зегьы ConIFA асаит аҟны иубар алшоит. Даура Логәуа игәыԥ 16 матч амаҵ азырураны иҟоуп.
