АҞӘА, рашәарамза 2 – Sputnik, Бадраҟ Аҩӡба. Кәыдрытәи аиҩхааҟны рашәарамза акы азы амҩатә машәыр ҟалеит. Фҩык аԥсуа ҳәаахьчаҩцәа зҭатәаз автомашьына Кәыдрытәи аиҩхааҟны ахра иаҿҟьеит. Дҭахеит аҳәаахьчаҩ Тариел Ломиа. Абри атәы ҳзааицҳаит Аҭагылазаашьа ҷыдақәа рминистр Лев Кәыҵниа.
"Асааҭ 21:30 рзы аинформациа ҳауит. Амашьына жәаметрак иҟаз ахра иаҿҟьеит. Фҩыуаак ҭан. Урҭ рахьтә аӡәы дҭахеит, егьырҭ ахәышәтәырҭахь инаргеит", — иҳәеит аминистр.
Лев Кәыҵниа иажәақәа рыла иҟалаз зыхҟьаз макьана еилкаам. Уи аилкаара рнапы иануп арратә прокуратура аусзуҩцәа.
