АҞӘА, рашәарамза 3 – Sputnik, Бадраҟ Аҩӡба. Аҟәа ақалақьи Аҟәа араиони рсанитартә ҳақьым хада Алла Белиаева илҳәеит акәыбырқәа рнырҵәаразы аҩбатәи аетап ишалаго. Рхы иадырхәо апрепарат акәыбырқәа рыдагьы атараканқәагьы ашьуеит. Абри атәы иҳәеит СЕС адизенфекциатә станциа аиҳабы Вартан Мумџьиан.
Акәыбырқәа рнырҵәаразы аусмҩаԥгатәқәа дара зынӡа иқәнахыр алшом, лҳәеит Алла Белиаева.
"Иҳәатәуп иҟаҳҵо акәыбырқәа шьаҭанкыла ишықәнамхуа, аха рхыԥхьаӡара армаҷыр алшоит", — лҳәеит лара.
Аусурақәа аҩбатәи ретап хыркәшахоит рашәарамза 8 рзы.
Аҳақьым хада иазгәалҭеит акәыбырқәа рнырҵәаразы аусурақәа ареспублика абжеиҳара шаҵанакуа. Аиҳарак уи аҩнеихагылақәа ахьгылоу ауп.
Аиҳарак Аҟәеи Пицундеи уи апроблема ҵарны иқәгылоуп, лҳәеит Белиаева.
Аусурақәа рымҩаԥгара иаҿуп Москватәи адизинфекциатә станциа. Уи иалахәуп Аԥсны асанитар-епидемиологиатә станциа аусзуҩцәагьы.
