АҞӘА, рашәарамза 7 — Sputnik, Саид Барганџьиа. Иури Карпов иналукааша аурыс етнограф, кавказдырыҩ иакәны дыҟан, ҳәа ҳаиҳәеит Агәманитартә ҭҵаарақәа ринститут адиректор ихаҭыԥуаҩ Сослан Салаҟаиа.
Салаҟаиа иажәақәа рыла Карпов Урыстәыла зегь аҟны Кавказтәи ажәларқәа рҭоурых азҟазацәа дреиуан.
"Иара иҭиҵаауан Даӷьысҭан, Чечниа ашьхауаа, иҭиҵаауан Ҟабарда-Балкариаа. Иури Иури-иԥа еиуеиԥшым акапиталтә монографиақәа дравторын", — иҳәоит Салаҟаиа.
Карпов еиҳарак мрагыларатәи Кавкази ацентртә Кавкази дышрыдҳәалазгьы Аԥсны даара бзиа ибон. Изныкымкәагьы арахь даахьан.
"Карпов арахь даауан уи рацәак ибзианы ианырымшьозгьы. Ҳҵарауаа аус рыциуан. Иара ицәыӡра даара игәыхьуп ҳарҭ зегьы ҳзы", — иҳәоит Салаҟаиа.
Юрий Карпов диит 1956 шықәса рзы. 1981 шықәса инаркны ихы рылаирхәуан аекспедициатә ҭҵаарақәа Даӷьысҭан, Аҩада Уаԥстәыла, Ингәыштәыла, Чечниа, Қырҭтәыла, Ставропольтәи атәылаҿацә рҟны.
Юрий Карпов иԥсҭазаара далҵит цәыббрамза, 2015 шықәса рзы 59 шықәса дшырҭагылаз.
