АҞӘА, рашәарамза 8 – Sputnik, Бадраҟ Аҩӡба. Ашьапылампыл азы адунеи ачемпионат аҟны ҳиааира ахәаԥшыҩцәагьы ирыбзоуроуп, иҳәеит Аԥсны ашьапылампыл азы Афедерациа апрезидент Руслан Аџьынџьал апресс-конференциаҟны.
"Астадион аҟны иҟаз ахәаԥшыҩцәа иаадырԥшуаз аӡәыкра ажәала ҳәашьа амам. Ҳажәлар сгәы рыладууп. Зегьы ҭабуп ҳәа расҳәар сҭахуп иҳарҭаз адгылараз. Исҳәар сылшоит урҭ ракәымзаар асеиԥш аиааирагьы ҳзымгар шыҟалоз", — иҳәеит иара.
Руслан Аџьынџьал иҳәеит Чагос ада егьырҭ акомандақәа рыцыхәмарраан аҿагылара ӷәӷәа шроуаз.
Аԥсны акоманда агәыԥ "А" иалан. Аԥхьатәи рыхәмарраан 9:0 ҳәа Чагостәи акоманда иаиааиит. Уи ашьҭахь изцыхәмаруаз Мраҭашәаратәи Ермантәыла акоманда иаиааиит 1:0 ҳәа. Лапландиеи Аԥсни ркомандақәа рыхәмарра — 2:0 ҳәа ихыркәшахеит.
Рфиналтә хәмарраан Пенџьабтәи акоманда иаиааины атурнир иачемпионцәахеит.
