АҞӘА, рашәарамза 10 — Sputnik. Еиҭамҵуа амазара урыстәылауаа раархәара азҵаара еиҭазыхынҳәтәуп, ҳәа азиԥхьаӡоит Аԥсны Аԥыза-министр Артур Амқәаб.
"Ҳара ҳҟны уаҩ дахьнымхои икоммерциатәуи амазарақәа урыстәылатәи аилакқәа – аиурист хаҿқәа ираадырхәоит. Анхарҭа ҭыԥқәа ракәзар, урҭ рыҭира аԥсуаа ирызцәырнаго азҵаарақәа рацәоуп. Аха сгәы иаанагоит ҳара уи азҵаара ҳазыхынҳәны, иаҳзаанаго абзиарақәеи ацәгьарақәеи ҭҵааны аҭыԥ иқәаҳҵап ҳәа. Ихадоу, Аԥсны атәылауаа ршәарақәа аԥызхуа азакәанԥҵара адкылароуп", — иҳәеит иара.
Амқәаб иазиԥхьаӡоит абри апроцесс Аԥсны аекономика аҿиара, хаҭала аргыларатә индустриа иацхраауеит ҳәа.
"Аӡәгьы иааимхәозар изҳаргылои? Ҳара иҳамоуп ҳхатәы ргыларатә маҭәахәқәа, зус здыруа аҟазауаа, убри азы ари аусхк аҿиара аиур алшоит", — иҳәеит Амқәаб.
