АҞӘА, рашәарамза 14 — Sputnik, Саида Жьиԥҳа. Акурорттә сезон алагамҭаз Гагра араион аҟны русура хацдаркит амшынтә транспорт маҷ аԥшәмацәа. Аха дара зегьы иазԥхьагәаҭоу аԥҟарақәа ирықәныҟәом.
Иахьа, амшынтә транспорт амилициа аусзуҩцәеи, ашәахтәқәеи аизгақәеи ринспекциеи, Гагра араион Ахадара акурорти атуризми аусбарҭа аусзуҩцәеи, араионтә Еизара адепутатцәеи рхаҭарнакцәа рыла ишьақәгылаз акомиссиа имҩаԥнагеит амшынтә транспорт маҷ аусураҿы иазԥхьагәаҭоу аԥҟарақәа еилазго анаплакыҩцәа ралкааразы.
Иахьа амшынтә транспорт маҷ аҳәынҭқарратә инспекциаҿы ашәҟәы иҭагалоуп еиуеиԥшым 500 аӡсратә хархәагақәа. Дара рхылаԥшраҿы иҟоуп 75 километр аҟәара, иаҳҳәозар аԥсшьарҭа ҩны "Мысра" инаркны аԥсуа-аурыс ҳәаа аҟынӡа.
Амшынтә транспорт маҷ аусура еиҳараӡак иахьымҩаԥысуа Гагра ақалақь агәҭаноуп.
Убри аҟнытә, аԥҟара аилагаҩцәагьы абраҟоуп иаҳа иахьырацәоу.
Акомиссиа имҩаԥнагаз агәаҭара иаанарԥшит, аӡсратә хархәагақәа раанҿасырҭа ҭыԥқәа иахьахәҭам ишыҟаз. Урҭ рыԥшәмацәа рганахь аԥкаанҵақәа шьақәыргылан, анаҩс дара аӡбарҭахь ишьҭхоит.
Амшынтә траспорт маҷ амшын аҟәараҿы аргылара ҟалом. Дара ирзалхуп Гагра ахәбатәи аиланхарҭаҿы аҭыԥ ҷыда. Аусура аамҭа ианҭыслак аԥшәмацәа рымшынтә хархәагақәа ирызԥхьагәаҭоу аанҿасырҭахь инаргароуп.
Иазгәаҭатәуп, амшынтә транспорт маҷ аԥшәмацәа гәыԥҩык, амшын аҟәара атехника ҷыда ахархәарала аанҿасырҭа аԥҵара ишалагаз, хымԥада урҭ рганахьгьы аԥкаанҵа шьақәыргылан.
"Аԥҟара аилагаҩцәа ралкааразы Гагра араион Ахадара аиҳабы ихаҭыԥуаҩ Константин Чыргба идҵала, лассы-лассы агәаҭарақәа мҩаԥгалахоит. Иахьа амшын аҟәараҿы агәаҭара мҩаԥаҳгазар, иааиуа амшқәа рзы амшын ҳхыланы, аӡсратә хархәагақәа русура шеиҿкаау ҭаҳҵаауеит. Изаҳӡарызеи, урҭ реиҳараҩык амшын иҭало ауааԥсыра рыԥсҭазаара ашәарҭара иҭадыргылоит", — иҳәеит Гагра араион амшынтә транспорт маҷ азы амилициа аиҳабы Лоран Иунусба.
