АҞӘА, рашәарамзаа 15 – Sputnik, Саид Барганџьиа. "Амшынеиқәафымцамч" апресс-маӡаныҟәгаҩ Алхас Гагулиа Sputnik иазеиҭеиҳәеит рашәарамза 14 рзы Гагратәи араион фымцада аанхара мзызс иамаз атәы. Иара иажәақәа рыла ашоура иахҟьаны звольт ҳараку ацәаҳәақәа руак еиҵыҵит. Уи иахҟьаны амца акит, араионгьы фымцада иаанхеит, хәа иҳәеит Гагулиа.
Уажәы авариа ахьыҟалаз аҭыԥ аҟны аусурақәа мҩаԥысуеит. Иара иазгәеиҭеит авариа имариам ак шакәу, аҭагылазаашьа аҭышәныртәаларагьы аамҭа шаҭаху.
"Аҭыԥ аҟны аремонттә усурақәа ирҿуп. Ҳгәаанагарала афымцалашара амш иҭакӡаны иҟалароуп" — иҳәеит Гагәылиа.
Иара убасгьы дазааҭгылеит гагра араион аҟны аҭагылазаашьа акыр ишыуадаҩу, афымцацәаҳәақәа аидара хьанҭа ишаҵоу.
"Ҳара уаанӡагьы иаҳҳәон аҭагылазаашьа шыуадаҩу. Авариақәа ҟамлакәа аԥхынтәи асезон ахысра уадаҩуп" — иҳәеит апресс-маӡаныҟәгаҩ.
Рашәарамза 14 рзы афымцатә цәаҳәақәа Псоу-220 Бзыбь-220 рҟны авариа ҟалеит. Уи инадҳәаланы араион фымцада иҟан.
