АҞӘА, рашәарамза 17 – Sputnik, Роберт Џьапуа. Ермантәылатәи апедиаторцәа, аневропотологцәа русура аихшьаалақәа ҟарҵеит. Урҭ ара 300-ҩык рҟынӡа ДЦП апроблема змоу ахәыҷқәа ҭырҵаауан. Абри атәы лҳәеит амедицинатә центр "Сурб Аствацамайр" ахәыҷтәы невропотологиа аҟәша аиҳабы Асмик Даниелиан.
"Еиуеиԥшым ачымазара змоу ахәыҷқәа ҭаҳҵааит. Абжьагарақәа раҳҭеит. Иҟоуп аутизм змоу ахәыҷқәа маҷымкәа. Хымш рыла ҳара ҳахь иааиит 300-ҩык рҟынӡа еиуеиԥшым апотологиа змоу ахәыҷқәа", — лҳәеит Данелиан.
"Аԥснытәи ахәыҷқәа ацхыраара рыҭаразы иҟоу адиагностикатә еиқәыршәара азхоны иҟам. Аҳақьымцәа ирҭахуп аелектроенцефалографиа акабинет еиҿкаазаарц, ҷыдала ахәыҷқәа рзы. Даҭахуп уи аҟазауаҩгьы. Излалшо ала аппаратк акәзаргьы иаахәатәуп", — лҳәеит лара.
Асмик Даниелиан илҳәеит аԥснытәи аҳақьымцәа рколлегацәа ирҿырҵаарц шырҭахыз рԥышәа.
Аусура аихшьаалақәа рымҩаԥгараан аминистр ихаҭыԥуаҩ Баҭал Кациа иазгәеиҭеит аицусура алҵшәақәа аанашьҭып ҳәа агәыӷра шимоу.
Жәларбжьаратәи афонд "Аԥсны" асоциалтә политиказы аилак аиҳабы Иулиа Гәынԥҳа, амедикцәа Аԥсныҟа раара еиҿызкааз, илҳәеит Ермантәылеи Аԥсни рмедикцәа ԥхьаҟагьы русеицура шазыԥхьагәаҭоу.
