АҞӘА, рашәарамза 27 – Sputnik, Бадраҟ Аҩӡба. Константин Ковач ихьӡ зху аҟазара ахәыҷтәы школ аҵаҩцәа аҩаша, рашәарамза 28 19:00 рзы имҩаԥыргараны иҟоуп агәыҳалалратә концерт Аԥснытәи аҳәынҭқарратә филармониаҟны.
Аконцерт далахәхоит еицырдыруа апианиноарҳәаҩы Ольга Дашевскаиа.
"Апианиноарҳәаҩы Ольга Дашевскаиа Аԥсны, зылшарақәа маҷу ахәыҷқәеи лареи анеибадыр ашьҭахь ажәалагала ҟалҵеит агәыҳалалратә концертқәа мҩаԥгазарц", — иҳәеит Михаил Алхазов.
Михаил Алхазов иажәақәа рыла актәи аконцерт мҩаԥган ҵыԥх.
"Пицунда аконцертқәа ҩба мҩаԥаагеит, акы — Аҟәа. Ҳаилацәажәеит ақәгыларақәа ирыцаҳҵаларц. Сынтәа хықәкны иҳамоуп Константин Ковач ихьӡ зху ахәыҷтәы школ ахыбра ацхыраара. Иаҳҭахуп зылшара маҷу, зхы иамыхәо ахәыҷқәа уахь рнеира ԥкымкәа иҟаларц", — иҳәеит иара.
Михаил Алхазов иазгәеиҭеит ҵыԥх — зылшара маҷу, зхы иамыхәо ахәыҷқәа иахьыхәмаруа адәы аиҿкааразы аԥара шеизыргаз.
