АҞӘА, рашәарамза 29 – Sputnik, Бадраҟ Аҩӡба. Ататриук ихьӡ зху Сҭамԥылтәи аҳаирбаӷәазаҟны жәларбжьаратәи атерминали, амашьынақәа рыргыларҭеи, аҩналарҭеи рҟны аԥжәарақәа ҟалеит аҩаша, 22:00 сааҭ рзы. Аԥжәарақәа раан кавказтәи адиаспора рҟынтәи аӡәгьы ԥырхага имоуит ҳәа ааицҳаит Ҭырқәтәыла иҟоу Аԥсны ахаҭарнак Инар Гыцба.
"Ҳара ес-сааҭ аинформациа ҳауеит Ҭырқәтәыла иҟоу акультуратә центрқәа Рфедерациа аҟынтәи. Иаҳҳәар ҳалшоит аԥжәарақәа раан кавказтәи адиаспора рҟынтәи аӡәгьы ԥырхага имоуит ҳәа. Абри аамҭазы иҭахаз 27-ҩык рыԥсыбаҩқәа еилкаауп ҳәа. Ахәра змоу рҟынтәи аӡәы Урыстәыла датәылауаҩуп. Уи иҭагылазаашьа уацәшәартә иҟам", ҳәа азгәеиҭеит иара.
Инар Гыцба иара убасгьы иазгәеиҭеит аԥжәарақәа раан аҳаирбаӷәазаҟны ареис Сҭамԥыл-Шәача ахь аҭаҩрақәа хыркәшан, уи ареис аҟны иҟан Аԥсны атәылауаагьы ҳәа.
"Анцәа иџьшьаны урҭ аԥжәарақәа аныҟалоз аамҭаз дара аԥырраԥхьатәи ауадаҿы еизахьан, аҳаирбаӷәаза аусуҩцәа урҭ иаарласны аҳаирплан асалон ахь инаргеит. Аӡәгьы ԥырхага имоуит", — иҳәеит Гыцба.
Инар Гыцба иҳәеит Аԥсны ахаҭарнакра атеракт иахҟьаны иҭахази ааха заузи рсиа лымкаала иашьклаԥшуеит ҳәа.
