Бадри Есиава, Sputnik
Москвеи Шәачеи рҟынтәи асерфингистцәа ҩынтәуп Аԥсны иаҭаауеижьҭеи. Раԥхьаӡа акәны урҭ Аԥсныҟа иааиит ҵыԥх, аӡынразы. Усҟан оумашәа ирбеит аратәи ацәқәырԥақәа реицааира аокеан аҟнеиԥш иахьыҟаз.
"Аԥсны ҳара ҳзы иҿыцыз ҭыԥын. Оумашәа иаабеит ацәқәырԥеицааира аокеан аҿтәи иахьеиԥшу. Уи адагьы ашықәс ахы-аҵыхәа амшын хьшәашәара дук аманы иҟам", — иҳәеит асерфинг азы апрофессионал Константин Кокорев.
Константин Кокорев Урыстәыла раԥхьатәи арктикатә серфингиступ. Иҩызцәеи иареи аа-шықәса ирықәуп абри аспортхкы рнапы алакуижьҭеи. Имаҷуп аҭыԥқәа иахьыҟамыз, Урыстәылатәи амшынԥшаҳәақәа инадыркны Фиджии Балии рҟынӡа. Асерфинг дара рзы изанааҭым, иԥсҭазаароуп.
Шықәсқәак раԥхьа дара ихацдыркит зметраж кьаҿу афильмқәа рҭыхра. Аԥсни дареи реибадырра ашьҭахь ирыӡбеит араҟатәи амшынԥшаҳәагьы аҭыхра.
Аԥсны асерфинг ианаалом ҳәа ирҳәо иашам, ҳәа азиԥхьаӡоит Шәача инхо Давид Џьалаӷаниа.
"Аԥсны ԥыжәара хаданы иамоу амшын цқьеи, зых иақәиҭу аӡтәы ҵакыреи роуп. Шәача акәзар аԥхын уаала иҭәуп, иалало аӡиасқәа идырхәашьуеит, дара урҭгьы аолимпиада ашьҭахь ацәқәырԥақәа еиҭаркуеит", — иҳәеит Давид.
Урыстәылатәи асерферцәа иазырыԥхьаӡоит асерфинг аганахьала Аԥсны аԥеиԥш ду амоуп ҳәа.
Аспортсменцәа еиҭарҳәеит Урыстәыла асерфинг рылаҵәо иалагеит аабаҟа шықәса раԥхьа, аха уажәоуп еиҳа уи зхы азызкуа рацәахо ианалага ҳәа. Иаадыртуа иалагеит адәқьанқәа асерфингмаҭәахәқәа ахьырҭиуа, иаԥырҵо иалагеит абрендтә маҭәа. Аԥсынгьы уи амҩа иқәлар алшоит ҳәа иазырыԥхьаӡоит дара.
Асерфинг реиҳа ишәарҭоу аспортхкқәа ирхыԥхьаӡалоуп.
"Иҟоуп аҭыԥқәа аԥсҭазааразы ишәарҭоу – ацәқәырԥақәа ахьдуу, амшын ацаҟьақәа ахьалыҳәҳәо, аха Аԥсны усеиԥш шәарҭара алам. Араҟа ихадароу ибзианы аӡсароуп", — иҳәеит Константин.
Иазыԥхьаӡоуп асерфинг аԥхьа ицәырызгаз гаваиаа роуп ҳәа. Урҭ иҟарҵоз аӷәқәа 70 кьыла рҟынӡа инаӡон. Семуел Уоллис инапаҵаҟа иҟаз афрегат "Дельфин" мшынла адунеи ианакәшоз Таити, 1767 шықәса рзы раԥхьаӡа акәны ирбеит асерфинг.
