АҞӘА, ԥхынгәы 4 – Sputnik, Роберт Џьапуа. Атәыла Ахада Рауль Ҳаџьымба Аԥсны Аҭагылазаашьа ҷыдақәа рминистрра аусзуҩцәа ирыдиныҳәалеит аминистрра еиҿыркааижьҭеи жәа-шықәса аҵра.
"Ари аилазаара аҵак ду амоуп. Имҩаԥыжәго аусурақәа ауааԥсыра рзы ихәарҭоуп. Еилкаауп шәусура ауадаҩрақәа рацәаны ишацу. Сгәы иаанагоит атәылауаагьы уи бзианы ирдыруеит ҳәа. Аԥсны анапхгара ирылшоз ҟарҵеит асеиԥш иҟоу аилазаара еиҿкаахарц, аҿаԥхьа иқәгылоу аусдҵақәа ишахәҭоу еиԥш инанагӡаларц. Ҭабуп ҳәа шәасҳәоит шәхы мшаҭакәа ҳауаажәлар ашәарҭадара шыҟоу рнырыртә аус ахьыжәуаз", — иҳәеит Ҳаџьымба.
Атәыла Ахада Идҵала аминистр Лев Кәыҵниа ианашьоуп изаамҭанытәиу ахьӡ ҷыда: аҩныҵҟатәи амаҵзура аинрал-маиор ҳәа.
Жәа-шықәса раԥхьа, ԥхынгәы 4 2006 шықәса рзы иаԥҵан Аԥсны Аҭагылазаашьа ҷыдақәа рзы Аусбарҭа. 2014 шықәса рзы Аусбарҭа Аминистрра ҳәа ахьыӡҵан.
