АҞӘА, рашәарамза 4 — Sputnik, Сырма Ашәԥҳа. Ԥсабарала иуаҩы аамысҭашәоу, ауаҩ нага ҳәа ззырҳәо Илиа Шәлиман-иԥа 100 шықәса ихыҵит. Уи аҳаҭыр азы "Жәларбжьаратәи афонд Аԥсны" ахаҭарнакцәа абырг аҳамҭақәа рыманы изнеит. Ҳәарада, ари ахҭыс иара гәахәала идикылеит. Агәамч-агәабзиара изеиӷьаршьеит.
"Аԥсуаа жәытә-натә аахыс атәым милаҭ изларыламҩашьоз, рыхьӡ зларҳәоз рхатә ҷыдарақәа рыман. Убарҭ ируакуп — Ақәра нҵыра ду. Шәара шәылаԥш ахара инаӡоит, шәдоуҳамч ӷәӷәоуп. Агәыцқьареи, аманшәалареи, аизҳазыӷьареи шәыманы адунеи шәақәлахааит! Акыр шықәса ҩаԥхьа шәҳагымзааит!", — ҳәа азгәаҭоуп Сонер Гогәуа абырг ихьӡала инаишьҭыз адныҳәаларатә шәҟәаҿы.
Афонд ахаҭарнакцәа изларҳәо ала, абырг игәы бзиоуп, агәашьамх иҵоуп. Нугзар Логәуа, Илиа Шәлиман-иԥа диазҵааит, абас еиԥш шәықәра иаҵаҵәаху амаӡа ҳзаашәыртуама, ҳәа. Иара аҭакс иҳәеит:
"Сара сышьхауаҩуп, 60 шықәса шьхала сааӡоуп. Сыԥсҭазаараҿы избахьоу ацәгьеи абзиеи рацәоуп, аха макьана сгәыразра саанагозшәа сбоит. Аԥсуа дахьыҟазаалакгьы ԥсуаҵас ихы ныҟәигозароуп, ҳара ҳҵасқәа ҳрықәныҟәалар, аҿар идмырӡыр, уи еиӷьу ԥсҭазаара ҟалом. Аԥсуа ичеиџьыка, иламыс ишақәнагоу иныҟәугар, иаргьы уныҟәнагоит. Ҳажәлар аизыразра рыманы, рҳәоу еиқәшәо, иныҟәибаго иҟалар сҭахәуп", — ҳәа дцәажәон иажәа раӡо абырг бзиа Илиа Дочиа.
Аныҳәаҩ ихы идиныҳәалартә еиԥш иҟоу ауаҩы, зыхшареи, змаҭацәеи рыла згәы ҭыгоу Илиа Шәлиман-иԥа, изнеиз асасцәа ҷыдала пату рықәиҵеит. Досу изнеишьа дақәшәон, ихәҭаз ажәа иҳәон.
"Шәара шәаара мацара сара сзы иҳамҭа дууп. Сара инысҵыз аҟара ҩба инышәҵааит. Шәӷьацааит!", —абас, иныҳәаԥхьыӡқәа нҵәара рықәмызт Илиа Шәлиман-иԥа!
