АҞӘА, ԥхынгәы 6 — Sputnik, Бадраҟ Аҩӡба. Аҩныҵҟатәи аусқәа рминистрра абарҵа ахыб амца адыркит "Молотов икоктеиль" агәыдҵаны. Абри атәы аҭыԥ аҟынтәи иааицҳауеит ҳкорреспондент.
Амца аҽеибанаҭаанӡа аминистрра аусзуҩцәа иалдыршеит арцәара.
Аоппозициа анапхгареи атәыла анапхгареи рыбжьара ԥшь-сааҭк инарзынаԥшуа аилацәажәара цоит аминистрра ахыбра аҩныҵҟа. Аилацәажәара иаҵанакуеит аминистр инапынҵақәа рааныжьра азҵаара аӡбра.
Аилацәажәара аамҭа рацәа ахьагоу агәынамӡара рызцәырнагоит еизаз.
Амитинг аҟны еизаз дҵаны иқәдыргылон Аҩныҵҟатәи аусқәа рминистр Леонид Ӡаԥшьба имаҵура дамхзарц. Дара атәыла Ахада идикыло аӡбра иазымԥшыкәа аминистрра ахыбра изныкымкәа иҩынтәымкәа иажәлоит.
Аҩныҵҟатәи аусқәа рминистрра ахыбрахь инагоуп агәыԥ ҷыда. Урҭ ауаа ахыбра аҩныҵҟа рыҩналара аԥдырҟәҟәаауеит.
Еизаз дҵаны иқәдыргылоит Аҩныҵҟатәи аусқәа рминистр Леонид Ӡаԥшьба имаҵура дамхзарци зыҿҳәара иахыԥахьоу апаспортқәа рыла абжьыҭира азин ҟарҵарци.
Убри инацҵаны дҵаны иқәдыргылоит Урыстәыла аҵакырадгьыл аҿгьы ареферендум амҩаԥгаразы абжьыҭирҭа ҭыԥқәа аартхарц.
