АҞӘА, ԥхынгәы 7— Sputnik, Владимир Бегунов. Ааха рыманы ахәышәтәырҭахь рнагара иалагеит асааҭ ааба шыҟаз, ҳәа ҳкорреспондент изеиҭеиҳәеит Ареспубликатә хәышәтәырҭа аҳақьым хада Асҭамыр Иванба.
Асааҭ акахьы инеиуаны ахәышәтәырҭахь инаргеит аиҿахысраан ааха зауз.
Аҳақьым хада ишиҳәаз ала ирыԥхьан ахирургцәеи, анестезиологцәеи, атравмотологцәеи рбригадақәа.
"Иаха ҳамчқәа азҳархеит, аха иааргоз ауаа рхыԥхьаӡара еиҳахазҭгьы ҳҭагылазаашьа уадаҩхон. Анцәа иџьшьаны амитинг аҟынтәи иааргаз ацхыраара анраҳҭа ашьҭахь иоуҳашьҭыртә иҟан рҭагылазаашьа", — иҳәеит иара.
Уажәазы анеирохирургиа аҟәшаҟны ишьҭоуп хҩык апациентцәа. Ахәра змаз аӡәы аҩныҟа доушьҭуп. Атравмотологиаҟны аԥҵәарақәа рыманы ишьҭоуп ԥшьҩык.
Ареспубликатә хәышәтәырҭаҟны иаашаанӡа аоперациақәа цон.
Аҩаша, ԥхынгәы 5 рзы имҩаԥысуаз аоппозициа аизара азинеилагаратә стихиатә митинг ахь ииасит.
