АҞӘА, ԥхынгәы 7 – Sputnik. Ахҭысқәа раԥырҟәҟәаареи рызхьаԥшреи рзы Амеханизм аҳәаақәа ирҭагӡаны Гал ԥхынгәы 6 рзы имҩаԥысит ақырҭуеи аԥсуеи делегациақәа реиԥылара. Аиԥылараҟны ирылацәажәан еиуеиԥшым азҵаарақәа: 2007 шықәса рзы Галтәи араионтә алхратә комиссиа аиҳабы Давид Сигуа иӷьычра, Атәылахьчара аминистрра аусзуҩ Едуард Еминзаде ишьра уҳәа иреиԥшқәаз. Абри атәы Sputnik иазеиҭарҳәеит Адәныҟатәи аусқәа рминистрра аинформациа аҟәшаҿы.
"Аҭагылазаашьа ахцәажәара аҳәаақәа ирҭагӡаны ирылацәажәан еиуеиԥшым азҵаарақәа. Ишьҭыхын азҵаара Гал араион аҟны иаарԥшыз абџьарҵәахырҭа аганахьала. Ашәарҭадаратә маҵзура иамоу адыррақәа рыла уи аззырхиаз Қырҭтәылатәи адиверсиа-ԥшыхәратә гәыԥқәа роуп", ҳәа аҳәоит иҳауз адырраҭараҟны.
Ақырҭуа ган акәзар ишьҭнахит лаҵарамза 19 2016 гшықәса рзы ақырҭуа-аԥсуа ҳәааҟны аҭыԥ змаз, Қырҭтәыла атәылауаҩ Гигла Отхозориа ишьра.
Аганқәа алацәажәеит абри ахҭыс аганахьала амҩаԥысра иаҿу ашьаусеилыргара.
"Иааидкыланы аиԥылара алҵшәақәа аман. Аганқәа иазгәарҭеит ԥхьаҟагьы абри аформат ала аиԥыларақәа рымҩаԥгара хра аманы ишыҟоу. Анаҩстәи аиԥылара мҩаԥысраны иҟоуп Гал, нанҳәамза 2 2016 шықәса рзы", ҳәа арбоуп аминистрра адырраҭараҿы.
Ахҭысқәа раԥырҟәҟәаареи рызхьаԥшреи рзы Амеханизм аҳәаақәа ирҭагӡаны имҩаԥысыз аиԥылара иалахәын Аԥсны Ашәарҭадаратә маҵзура ахантәаҩ ихаҭыԥуаҩ Владимир Арлан, Аԥсны Ашәарҭадаратә маҵзура галтәи араионтә ҟәша аиҳабы Ҭимур Шергелиа, Аԥсны Ашәарҭадаратә маҵзура ацентртә аппарат аҟәша аиҳабы ихаҭыԥуаҩ Асҭамур Колбаиа, Аҩныҵҟатәи аусқәа рминистрра Галтәи араионтә ҟәша аиҳабы Гиа Чачхиани, Адәныҟатәи аусқәа рминистрра аинформациа аҟәша аиҳабы Ҭенгиз Ҭарба.
