АҞӘА, ԥхынгәы 8 – Sputnik, Роберт Џьапуа. Аԥсны Аҭагылазаашьа ҷыдақәа рзы аминистрра аусзуҩцәа иахеи иахьеи илеиз ақәаршҩы ахҟьа-ԥҟьақәа рҭыԥ иқәырҵоит. Абри атәы ҳзааицҳаит Аԥсны Аҭагылазаашьа ҷыдақәа рзы аминистр ихаҭыԥуаҩ Тигран Делибалтиан.
"Еснагь еиԥш Шьчеглов имҩаҟны инхо аӡы рыҵалеит. Ақалақь агәҭа Академик Марр имҩаҿ агәам-сам аӡы еизаҳәҳәеит, иара убасгьы Лакобеи Воронови рымҩақәа ӡыла иҭәит. Аҩадатәи Ешыра иахьаҵанакуа ацентртә трассаҟны ахаҳәқәа леит, аха аныҟәара ауртә амҩа дрыцқьахьеит", — иҳәеит аминистр ихаҭыԥуаҩ.
Тигран Делибалтиан иара убасгьы иазгәеиҭеит ақәаршҩы ахҟьа-ԥҟьақәа раԥыхара аминистрра аусзуҩцәа ашьыжь асааҭ хәба рзы нап шадыркыз.
