ТҞӘАРЧАЛ, ԥхынгәы 10 – Sputnik, Бадри Есиава. Тҟәарчал араион ауааԥсыра ареферендум ахь анеиразы аамҭагьы рымам агәалаҟазаарагьы рымам иҳәеит Жәлар Реизара адепутат Кан Кәарҷиа.
"Ауаа нхоит, инҵуеит. Рхатә усқәа ирҿуп, ақыҭанхамҩа рнапы алакуп, аоппозициа рызҵаара аҭак аҟаҵараз аамҭагьы рымам агәалаҟазаарагьы рымам", — иҳәеит Жәлар Реизара адепутат Кан Кәарҷиа.
Иара игәаанагарала ареферендум ахь ауаа рымнеира аоппозициатә блок ареферендум абаикот азаауеит ҳәа ирҳәаз иадҳәаланы иҟам.
Аԥшьгаратә гәыԥ ишьақәнаргылаз ашәҟәқәеи еизнагаз ауааԥсыра рнапынҵақәеи ҵаҵӷәыс иҟаҵаны 2016 шықәса хәажәкырамзазы Ацентртә алхратә комиссиа иадгалан ареферендум амҩаԥгаразы арзаҳал.
Атәыла Ахада идикылаз Адҵала ареферендум мҩаԥысраны ишьақәыргылан ԥхынгәы жәаба.
